Бора Милутинович: «Ўзбекистон футболи атрофида уни тушунмайдиган одамлар бўлган»

[left][/left]
Бугун эътиборингизга дунё футболида ўз номига эга бўлган, бир нечта терма жамоаларни Жаҳон чемпионатига олиб чиққан ва айни дамда Қатар давлатида яшаётган сербиялик мутахассис Бора Милутиновичнинг ўзбек футболи ҳақидаги фикрларини ҳавола этамиз.

Аслида, у билан январь ойининг охирларида гаплашгандим ва интервьюни атайин сайтнинг янги дизайни учун олиб қўйгандим. Бугун вақти етибди, сизга ҳам илинмоқчиман.

Хизмат сафари ва ҳамкорлик юзасидан Тошкентнинг "Пахтакор" жамоаси билан Доҳа шаҳрига "Ал-Гарафа"га қарши ўйинга боргандим. Ўша ерда, Доҳанинг диққатга сазовор жойларининг бирида, аниқроғи Doha Villagio мажмуасида ушбу мутахассис билан кўришиб қолдим. Мен билан бирга бўлган ва Тошкентдан келган яна 3 та ишқибоз ҳам Милутиновични кўришди, лекин улар шошаётганлари боис ўз йўлларида давом этишди.

Мен фурсатини топиб, у билан икки оғиз суҳбатлашишга муваффақ бўлдим. Савол ва жавобларни биз бир-биримизга беравердик.

- Мистер Милутинович, ассалому алейкум! (арабча талаффузда саломлашишга ҳаракат қилдим, чунки у аллақачон араб тилини ўрганиб кетган бўлса керак, деб тахмин қилдим)
- Салом, яхшимисиз?

- Мени эслай олмасангиз керак, сиз билан Бразилияда кўришгандик. Мен ўзбекистонликман, журналистман.
- (бир фурсат ўйланиб) Бўлса бордир, яхшимисиз? Ўзбекистон тинчми? Нималар қилиб юрибсиз бу ерларда?

- Тошкентнинг "Пахтакор" жамоаси билан келгандик, "Ал-Гарафа"га қарши ўйин ўтказамиз. Соғлиқларингиз жойидами? Доҳада яшаяпсизми?
- Ҳа яхши бўлибди. Кучли ўйин бўлса керак кечқурун. "Гарафа" легионерларни сотиб олган. Соғлиқлар кўз тегмасин жойида (кулиб). Бир неча йилдан бери Доҳадаман. Ўзбекистон чиқа олмади-я Жаҳон чемпионатига?

- Афсуси, ҳа. Ўзбекистон бу сафар ҳам мундиалга бора олмайдиган бўлди. Сизга ўхшаган мутахассислар термамиз штабида ишлаганида балки биз ҳам бошқаларга ўхшаб ЖЧ шукуҳини ҳис қилармидик?!
- Бизга энди кеч. Юраклар ортиқча уришга бардош бера олмайди. 70 дан кейин одам ўзини асраши керак. Термангизни салоҳияти етарди, аммо...

- Гапингиз тўғри, лекин ўша аламлар қолганда, унутиш қийин бўляпти.
- Катта муваффаққиятларга эришишдан аввал мағлубиятни обдон таътиб кўриш лозим. Аввалам бор, мағлубиятлар жонга тегиши керак. Бу табиий жараён ва у ўтиб кетади. Ўзбекистон термасида имкон етарли деб ўйлайман. Сизлар Осиё футболида мавқега эгасиз. Фақат ҳамма давлатда бор бўлгани каби, футболингиз атрофида уни тушунмайдиган одамлар бўлган. Улардан кейин футболингиз барибир кўтарилади. Бу ҳаммада бор нарса. Вақт ўтгач, тушуниб етишади.

- Биз ҳам умид қиляпмиз. Ўзбекистон футболида ўзгаришлар кўп бўляпти. Меваси бўп қолар ахир...
- Нега бўлмас экан? Агар тўғри иш қилаётган бўлсангиз, бир кун келиб ҳосилини кўрасиз. Менимча, терма жамоа, умуман клуб миқёсида бўлса ҳам мураббийлар штабига ҳориждан энг камида эксперт олиб келиш керак. Жисмоний ҳолат учун алоҳида мутахассис жалб қилиш лозим. Мен европаликларни назарда тутяпман.

- Тушунарли. Бизда ҳам энди шунга қараб кетяпти. Мақсадлар улкан. 2022 йилга келмасак бўлмайди.
- Келинглар, насиб қилса кўришармиз яна.

- Айтинчи, Қатар ЖЧ-2022га улгурармикан? Мен кўряпманки, ҳали унақа тайёрга ўхшамайди. Стадионлар ҳам тўлиқ битмаган, йўлларда таъмирлаш ишлари ва ҳоказо.
- Ҳукумат улгурамиз деяптику. Улгурса керак. Бошқа тарафдан эса "money isn't everything" (у бу гапи билан ҳар доим ҳам пул ҳал қилавермайди, демоқчи бўлди шекилли)

- Бора, сизга омад! Соғ бўлинг! Ўзбекистонга келинг, меҳмон бўлиб.
- Раҳмат, насиб қилса албатта.

Манба: www.uff.uz “Замин” янгиликларини “Одноклассники”да кузатиб боринг