Таҳлил: Роналдунинг трансферидан ким ютди?

Mухлислар энди янги мавсумдан бошлаб унинг иштирокидаги голлар шодасини ҳар ҳафта кўриши мумкин. Фарқи бу сафар беш карра “Олтин тўп” соҳиби “Ювентус” либосида бу голларни уради.
Гарет Бэйл Испаниядаги келажаги ҳақида қарорсиз эди, бироқ унинг юлдуз жамоадоши клубни тарк этгач, “Реал”да қоладигандек кўринмоқда. Қуйида, нима учун Криштиану Роналдунинг трансферидан уэльслик футболчи ютгани ҳақида муҳокама қиламиз.

“Реал Мадрид” 26-май куни Киевда Чемпионлар Лигасини ютганидан кейин Гарет Бэйл ва Криштиану Роналду иккалови клубни тарк этишлари мумкинлигига шаъма қилган эди. Роналду ўтган мавсумни анча муваффақиятли ўтказган бўлса, Бэйл яна қийинчилик билан мавсумни бошидан кечирди.

Агарда кимдир “Сантьяго Бернабеу”ни тарк этиши керак бўлса, Роналду эмас, Бэйл бўлишига барчанинг ишончи комил эди. Аммо ўшандан бери орадан икки ой ўтди ва Роналду “Ювентус”да жавлон уришга тайёрланмоқда. Уэльслик вингер эса “Реал”да олтинчи мавсумини ўтказишга шайланмоқда.

“Мен агентим билан гаплашиб оламан. Мен кўпроқ ўйнашга муҳтожман. Бу йил менга берилган ўйин амалиётидан мамнун эмасман. Финални асосий таркибдан бошламаслик қониқарсиз” – деган эди Чемпионлар Лигаси финалидан кейин Бэйл ўз таассуротларини ўртоқлашаркан.

Шундай бўлиши керак эди. Бироқ у захирадан майдонга тушиб жамоасининг 3-1 ҳисобида ғалаба қозонишига катта ҳиссасини қўшди. Кейинроқ Кардиффда берган интервьюсида ҳам у ўзини оқлашда давом этди. “Олдин ҳам айтганимдек, ўйинни илк дақиқадан бошламасликдан жаҳлим чиқади. Мен баъзи ўйинларга жалб қилинишим кераклигини билардим.”

“Гол уриш ажойиб бўлди. Ҳақиқий ҳиссиёт. Мен доим чалқанча услубда гол уришни орзу қилардим. Менинг жойим буни бажаришимга жуда мос эди.”

Ўз навбатида эслатиш жоизки, португалиялик юлдуз Чемпионлар Лигаси чорак финалида янги жамоаси “Ювентус”га ҳудди шунақа услубда гол уриб, итальян мухлисларнинг олқишига сазовор бўлган эди.

Бу мухлислар энди янги мавсумдан бошлаб унинг иштирокидаги голлар шодасини ҳар ҳафта кўриши мумкин. Фарқи бу сафар беш карра “Олтин тўп” соҳиби “Ювентус” либосида бу голларни уради. Июль ойи бошида А Серия чемпиони 100 миллион евро эвазига Роналдуни Италия чемпионатига олиб келди.

Унинг кетиши ортидан “қироллик клуби” Роналдуга муносиб ўринбосар сифатида Неймар, Мбаппе ва Азарларни нишонга олган. Бироқ уларнинг ҳеч бири тўққиз мавсум давомида 438 ўйинда 450 гол урган португалиялик футболчининг ўрнини тўлдира олмайди.

Бундан ташқари, “ПСЖ” дунёнинг энг қиммат ҳужумчисини ва ёш французни ҳам қўйиб юбориш ниятида эмас. Шунингдек бельгиялик футболчининг укаси ижтимоий тармоқларда акаси “Реал”га ўтмаслигини айтганидан кейин “Челси” вакили ҳам Мадридга кўчиб ўтиши қийин. Боз устига “аристократлар”нинг янги бош мураббийи Маурицио Сарри клуб етакчиси “Стэмфорд Бридж”да қолишига умид қилмоқда.

Шу тариқа, “Реал Мадрид” Бэйлни кетишига йўл қўймайди. Португалиялик юлдуз клубда йўқ ва янги мавсумда мадридликлар ўз режаларини “Тоттенхем”нинг собиқ вакили атрофида қуришни ният қилган бўлса ажаб эмас.

29 ёшни қарши олган Бэйл клубдаги беш мавсумлик фаолияти давомида 189 ўйинда иштирок этиб, 88 гол уришга эришган. Бу вақт ичида у тўрт марта Чемпионлар Лигаси совринини боши узра баланд кўтарди.

У “Реал”га келиб қўшилганидан бери умумий дақиқаларнинг 53 % да қатнаша олган. Ҳар бир голи учун 159 дақиқа керак бўлмоқда. Ўтган мавсум кесимида эса бу 112 дақиқани ташкил қилган.

Яна бир муҳим жиҳатни назардан қочирмаслик керак. Бу вақт оралиғида барча жарима зарбалари, пенальтиларни Роналду бажарарди. Айниқса сўнгги мавсумларда Роналду пенальтилар билан кун кўрадиган футболчига айланиб қолаёзди. Бэйл эса бу муддатда индамайгина унга юклатилган яратувчанлик вазифасини бажариб келди.

Энди, Роналду “Сантьяго Бернабеу”нинг ўтмишдаги бир қисмига айланди. Ўйин амалиёти етишмаётган Бэйл ўзининг янги кўринишига ўтиши мумкин. У Роналдусиз ҳаётнинг мавҳум бир саҳифасини очишга тайёрланмоқда.

Манба: Sports.uz “Замин” янгиликларини “Twitter”да кузатиб боринг