«Бу чакалакзорда фақат битта қирол бўлади». Нурмагомедов Мейвезерни жангга чақирди

UFC бўйича енгил вазн чемпиони, россиялик жангчи Хабиб Нурмагомедов америкалик боксчи Флойд Мэйвезерга қарши рингга чиқишга тайёр. 30 ёшли спортчининг чақириғи бокс менежери Дехуан Блэйкнинг инстаграмдаги саҳифасида жойлаштирилган.

«Олға, Флойд! Мен сен билан куч синашишга тайёрман, 50-0 27-0га қарши. Икки енгилмас йигит жанг қилади. Нега бундай бўлмаслиги керак? Кел! Жунглида фақат бир қирол бўлади, қирол эса менман. Мен Конорни енгдим, у энди йўқ. Мен уни осонлик билан таслим этдим», — деган Нурмагомедов.

Қайд этиш керакки, бунгача ҳам мухлислар аралаш курашлар жангчиси ва боксчи ўртасидаги беллашувга гувоҳ бўлишганди. 2017 йилнинг 26 августида кичик Мэйвезер бокс қоидалари бўйича Конор Макгрегор билан муштлашганди. Ўшанда америкалик 41 ёшли боксчи ирландиялик рақибини 10-раундда техник нокаутга учратган.

Бу тарихий жанг натижасига кўра америкалик боксчи махсус WBC Money Belt камарини қўлга киритган, 300 миллион доллар ишлаб олган ва боксчилик фаолиятини якунлаганди.

Шундан кейин у Макгрегор билан аралаш қоидалар бўйича жанг қилишга тайёрлигини маълум қилган, у октагонда шуғуллана бошлагани ҳақида хабарлар тарқалганди.

Икки вазн тоифаси собиқ чемпиони Макгрегор унвонларидан маҳрум этилиши ортидан фаолиятини якунлаганди, аммо у кейинроқ қайтишни амалга оширди ва енгил вазн тоифаси чемпионлиги камари учун Хабиб Нурмагомедов билан жанг қилиш ҳуқуқини қўлга киритди. 7 ноябрь куни Лас-Вегасда ўтказилган жангда россиялик спортчи муддатидан аввал ғалабага эришди, у тўртинчи раундда ирландиялик рақибини бўғиш услубида таслим этди.

Жангдан кейин Нурмагомедов ўзини тутиб тура олмади ва октагондан чиқиб, Макгрегорнинг тарафдорларига ҳужум қилди. Унинг тарафдорлари эса октагон ичида қолган Макгрегорга ташланишди. Бунинг учун жамоатчилик россияликларни кескин танқид остига олганди. Нурмагомедовга жанг учун гонорар тўланмади ва истиқболда дисквалификацияга учраши мумкин.

Бу воқеага Мейвезер ҳам ўз муносабатини билдириб ўтган.

«Мен Макгрегор билан жанг қилган бу йигитни яхши танимайман, аммо у мағлубиятга учрамаганини эшитганман. Унинг хатти-ҳаракати профессионалликдан йироқ. У октагонни тарк этмаслиги, унинг ташқарисида муштларини ишга солмаслиги керак эди.

Уни катта миқдорда жарима кутмоқда. Бунга ишончим комил. Заб Жубда билан жангимдан кейин рингда катта тўполон келиб чиққанди, ўшанда буни катта жарима билан жазолашганди. Адашмасам, 7та рақамли жарима бўлганди»,— дея америкаликнинг сўзларини келтирган Daily Mail.

Нурмагомедов ишини Невада штати спорт комиссияси кўриб чиқмоқда. Россиялик жангчи 24 октябргача вақтинчаликка дисквалификация қилинган. Муддат якунида якуний қарор эълон қилинади.

Жаримадан ташқари, Нурмагомедовга 6 ойлик дисквалификация қўлланиши кутилмоқда.

Мейвезер эса филиппинлик Мэнни Пакьяога қарши жанг ўтказишни режалаштирган. У Япониядаги мусиқа фестивалида эски танишни яна бир жанг ўтказишга чорлаганди.

«Мен шу йилда Мэнни Пакьяо билан жанг қилиш учун қайтдим. Яна бир 9 рақамли чек», дея ёзганди боксчи ўз инстаграмида.

Пакьяо ҳам жанг бўйича музокаралар кетаётганини тасдиқлаган.

«Бизда жиддий музокаралар кетмоқда. Биз Флойд билан Япониядаги тадбир вақтида учрашдик, фанатлар бизнинг учрашувимиздан хурсанд эди, Мейвезер билан жанг ўтказиш эҳтимоли ҳақида гаплашдик. Катта эҳтимол билан биз яна жанг қиламиз, аммо биз жанг қачон ва қаерда ўтказилишини келишиб олишимиз керак»,— дея Пакьяонинг сўзларини келтирган GMA News.

ОАВ маълумотига кўра, бу жанг декабрь ойи бошида ўтказилиши кутилмоқда.

Боксчиларнинг аввалги жанги 2015 йилнинг 2 майида Лас-Вегасда ўтказилганди. Ўшанда ҳакамлар бир овоздан Мейвезерни ғолиб деб топишган. Жанг трансляцияси жаҳон рекордини ўрнатганди. “Замин” янгиликларини “Youtube”да кузатиб боринг