16:09 / 26.11.2018
2 699

Равшан Ҳайдаров: «Ҳаммага ўзининг боласи Месси ёки Роналду бўлиб кўринаверади»

Равшан Ҳайдаров: «Ҳаммага ўзининг боласи Месси ёки Роналду бўлиб кўринаверади»
Ўзбекистон олимпия терма жамоаси бош мураббийи Равшан Ҳайдаров бугун Миллий олимпия қўмитасида бўлиб ўтган матбуот анжуманида селекция ишлари қандай йўлга қўйилгани борасида гапириб ўтди. Бу ҳақда Tribuna.uz хабар бермоқда.

«Селекционерларимизда футболчиларнинг жуда катта ҳажмдаги картотекаси бор. Биз иккинчи таркибни йиғганимизда уларни шунчаки ўйнатиб, ортга жўнатиб юбормаймиз. Уларни аввало психологик ва жисмоний тестлардан ўтказамиз. Ундан кейин ўйинларда, машғулотлар жараёнида уларнинг савиясини кўришимиз мумкин.

Албатта, ҳаммага ўзининг боласи Месси ёки Роналду бўлиб кўринаверади. Аммо бу кучли жамоага қарши ўйинда кўринади.

Олимпия терма жамоасида (шу йил бошида Хитойда Осиё чемпиони бўлган жамоа назарда тутилмоқда – Tribuna) 165 нафар футболчини кўрикдан ўтказгандик. Ҳар бир гуруҳни беш кун давомида синаб кўриб, ҳаммага имконият бердик.

Бундан ташқари, «Zo`r TV» ҳам яхши лойиҳа ўтказди. Республика бўйича кимдир балки қолиб кетаётгандир, ким ўзини кучини синаб кўрмоқчи, деган мазмунда эълон берди. Лойиҳа кўпроқ шоуга яқин тарзда ўтган бўлса ҳам, унда «Чиғатой»нинг профессионал мураббийларини бириктириб, шу лойиҳада ҳам селекция ишларини олиб бордик. Майли, болалар футболни яхши кўришади, кимдир клубларга кира олмаяпти. Айрим ота-оналар истак билдирди, кимдир эса ўзи мен ҳақиқатан ҳам олимпия терма жамоасига аъзо бўлишим керак, деб келди. Аммо шуниси аниқки, олимпия терма жамоаси профессионаллардан тузилиши керак. Шундай бўлса-да, уларга ҳам («Zo`r TV» лойиҳаси иштирокчилари – Tribuna) имконият бериш керак. Имкон берилди ҳам.

19-21 ёш оралиғидаги болаларни йиғиб, тест-кўриклардан ўтказишди. Танлаб олинганларда ўсмирлар терма жамоаси билан ўйнатдик. Кўпчилиги кўчада футбол ўйнаб юрган болалар эди, мана бу савияда ўзини қандай кўрсатишини кузатдик. Ҳар ҳолда, имконият эди бу ҳам. Мутахассисларни йиғиб, ўша ерда ўйинни кўрдик. Ўсмирлар термамиз 9-10та гол уриб ютди.

Лойиҳадан кейин федерацияларга: «Бу болага эътибор қаратинглар, клубга жойланглар, клубсиз кўчада юрмасдан мунтазам равишда шуғуллансин», деган тавсиялар билан жўнатилди. Бу ҳам оммавий футболни ривожлантириш бўйича олиб борилган иш эди. Аммо нима бўлганда ҳам, олимпия терма жамоасида ўйнайдиган футболчилар ўз клубларида муқим машғулотларда қатнашадиган, жуда бўлмаганда ёшлар лигасида доимий ўйнайдиган бўлиши керак. Талабларга жавоб бериши керак.

Мен клуб мураббийлари билан доимий алоқада бўлиб тураман, уларни тинч ҳам қўймайман. Ким қанақа ишлаяпти, ким ўйинга чиқяпти... Мана, ҳозир «Бунёдкор»да битта ҳужумчи ўсиб келяпти, уни (Dubai Cup турнирига - Tribuna) олиб кетиб, имконият бердик. Халқаро тажриба йўқ эди унда. Учта ўйинда имконият бердик, ўзини кўрсатди. Келажакка деб кўриб турибман, бу боладан у-бу нарса чиқади. Лекин буёғига профессионал ёндашув кетади», - дея таъкидлаб ўтди Ҳайдаров.

«Ҳозирги олимпия термасининг биринчи таркибига 30-32 нафар футболчи индивидуал сифатлари бўйича саралаб бўлинди. Буёғига шу жамоанинг ўйинини шакллантиришимиз керак. Саралаш жараёни ҳам давом этаверади. Кимдир порлаб чиқса, албатта, шу ўттизталикка киритамиз», - дея қўшимча қилди Равшан Ҳайдаров.

Эслатиб ўтамиз, жамоага Токио Олимпиадаси йўлланмасини қўлга киритиш вазифаси юклатилган. Келаси йил март ойида Тошкентда шу йўлдаги илк мусобақа – Осиё чемпионати саралаши бўлиб ўтади. Аввалроқ ушбу турнирга тайёргарлик доирасида ОТЖ Туркия ва Испанияда йиғин ўтказиши, Словакия ва Озарбайжон олимпия термалари билан ўртоқлик ўйинлари ташкил этилиши хабар қилинган эди.

Dasturlash foundation


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Спорт » Равшан Ҳайдаров: «Ҳаммага ўзининг боласи Месси ёки Роналду бўлиб кўринаверади»