Рўзиқул Бердиев - "Сўғдиёна"га мос мураббий

Кеча сайтимизда "Насаф" бош мураббийи Рўзиқул Бердиевнинг клубдан кетиши мумкинлиги ҳақида хабар чиқди.

Аввало шуни айтиш керак, Рўзиқул Саъдуллаевич малакали мутахассис ҳамда ёшлар билан ишлашни билади. Бердиев "Насаф" бош мураббийи сифатида бир қатор ютуқларга эришди ва яна жамоа рулида қоладиган бўлса, бундан кейин ҳам яхши натижалар қайд этишига умид қилса бўлади.

Аммо шамол бўлмаса дарахтнинг учи қимирламайди деганларидек, Рўзиқул Саъдуллаевичнинг жамоадан кетиши мумкинлиги ҳақида бекорга гап чиққани йўқ. Кўпчилик бу мавсум Бердиев учун "Насаф" бош мураббийи сифатидаги охиргиси демоқда. Лекин мураббий кетган тақдирда ҳам кўп вақт ишсиз қолмаса керак.

"Насаф"нинг бу йил кучли олтиликка кира олмагани Бердиевнинг айби билан эмас, балки клубда юзага келган молиявий ҳолат туфайли юз берди. Жамоа пулдан қийналиб қолди, натижада етакчиларнинг кетиши бошланди. Аввалига маҳаллий футболчилар, ундан кейин легионерлар кетиб қолди. Албатта, ҳозирги кунда бирор бир футболчини фақат яхши гап билан жамоада олиб қолиб бўлмайди.

Шунга қарамай, "Насаф" Суперлиганинг иккинчи босқичида ҳам ўзини кўрсата олди. Масалан, "аждарлар" асосий рақобатчилари "Қизилқум" ва "Қўқон-1912"га нисбатан кўпроқ очко жамғарди. "Насаф" ҳозирча 15 очко тўплади, бу икки жамоа эса 12 очкодан. Шахсий фикримча, агар Бердиев "Насаф"ни тарк этадиган бўлса, энг яхши вариант сифатида "Сўғдиёна" кўриняпти. Чунки келаси йил Жиззахда пул бўлса Бердиев жамоа билан қандай ишлаш кераклигини кўрсата олади.

Нега айнан "Сўғдиёна"? Вазиятга реал қарасак, Рўзиқул Саъдуллаевич водийга бормаса керак. Шунингдек, Тошкентга ҳам келмаслиги эҳтимоли катта. Арвеладзе "Пахтакор"да қоладиган кўриняпти, Фёдоров "Локо"ни чемпион қилди, Қосимов эса "Бунёдкор"даги энг асосий фигура ҳисобланади.

Яна кимлар қоляпти? Ҳамиджон Актамов "Қизилқум"ни ҳеч кимга бериб қўймайди. Шипилов "Металлург"га мос мураббий, айтганча бу ерда "Бухоро" ҳам бор. Лекин Бердиев "Бухоро"ни танлармикан. АГМКда ишлаб Бахтиёр Ашурматов Кубокни ютди, "Нефтчи" тушиб кетди, "Навбаҳор"га Канчелскис ўзи яқинда келди, Нўъмон Ҳасанов ҳам Қўқонда ёмон ишламаяпти.

Энди "Сўғдиёна"га келадиган бўлсак, раҳбарият Сергей Лушанга ҳамма шароитни қилиб берди. Ёзги трансфер пайтида фақат "Сўғдиёна" легионерлар лимитига тўлиқ амал қилиб ўз сафига бешта хорижликни қўшиб олди. Лекин натижа қани? Мана энди жамоа ўтиш ўйинида иштирок этади. Болалар футболидан чиққан Лушанга негадир катталар футболи мос келмаяпти. Шахсий фикримча, бу киши бирорта футбол мактабига директор бўлгани маъқул.

Мана шу тахминлардан келиб чиқиб Рўзиқул Бердиев мабодо "Насаф"дан кетадиган бўлса ҳам энг маъқул вариант "Сўғдиёна" деб ўйлайман. Чунки Жиззахда ҳам футболни Қаршидан кам бўлмаган даражада яхши кўришади. Қолаверса, Жиззахдан ҳар доим яхши футболчилар етишиб чиққан. Балки Бердиев ўз жойида қолиб бошлаб қўйган ишини давом эттириши ҳам мумкин. Лекин бошқа клубда ҳам ишлаб кўрса бунинг нимаси ёмон? “Замин” янгиликларини “Youtube”да кузатиб боринг