«Ростов» ҳужумчиси, якшанба куни «Спартак» билан ўйинда (2:1) ғалаба голини урган Элдор Шомуродов «Спорт Экспресс» мухбири саволларига жавоб қайтарди.
– Душанбада Ростов-Доннинг ҳақиқий қаҳрамонидек уйғондингизми?
– Бундай демаган бўлардим. «Спартак» устидан ғозонилган ғалабани унутиб, кейинги ўйин ҳақида ўйлаш керак.
– Москваликлар биринчи навбатда ниманинг ҳисобига мағлуб этилди?
– Иккита омилни айтган бўлардим: интизомли ўйин ва астойдил борини бериб ўйнаш ҳисобига. Йигитлар ўйин учун режани бажаришди. Ва, албатта, мухлисларнинг қойилмақом қўллаб-қувватлашлари. Уларга гап бўлиши мумкин эмас!
– Гол уришингизни олдиндан сезганмидингиз?
– Очиғини айтсам, ўйиндан олдин менга кўпчилик: «Элдор, сен майдонга тушиб, уни голсиз тарк этмайсан!» деганди. Жамоадошларим ва мухлислар ана шундай фикрда эдилар. Менга нега бунчалар ишонч билдиришаётганини билмайман, лекин якунда улар айтганидай бўлди. (кулади)
– «Спартак» нимаси билан ҳайрон қолдирди? Меҳмонлардан яхшироқ ўйин кутганмидингиз?
– Умуман олганда, рақибнинг ана шундай ўйнашига тайёрлангандик. Тан олиш керак, «қизил-оқлар» етарлича вазиятлар яратишди. Биз шунчаки ўз имкониятларимиздан яхшироқ фойдалана олдик.
– Ўзбекистонда сизни Месси деб аташади. Энди «Ростов»дагилар нима дейишяпти?
– Барибир бу фикрга қўшилмайман. Ўзбек Мессиси деб аташлари афсона холос. Мени ҳеч ким бундай деб чақирмаган.
– Унда нима деб чақиришади?
– Шома ёки Шомик. Ватанимда ҳам, бу ерда ҳам.
– Ўйин тугагандан кейин Валерий Карпин сизга нима деди?
– «Ўзинг хоҳласанг, қўлингдан келади».
– Демак, хоҳламайдиган пайтларингиз ҳам бўларкан-да?
– Йўқ, йўқ! Менда доимо бор имкониятимни ишга солиб ўйнаш хоҳиши бўлади. Шунчаки, мураббий ўз фикрини шунақа ифода этди.
– Ўйиндан кейин «Ростов» мухлислари ижтимоий тармоқларда: «Шомуродов – бизнинг янги Озмун» деб ёза бошлашди...
– Йўқ, мени Сардор билан солиштириш ярамайди. Унга хусуматим бор деб ўйламанг, аксинча, уни ҳурмат қиламан, у – Премьер-лиганинг энг яхши ҳужумчиларидан. Лекин Озмун – бу Озмун, мен эса – менман. Ҳали яна кўпроқ голлар уришим, ўйинимни кучайтиришим керак.
– Озмун ҳозир РПЛда биринчи рақамли ҳужумчими?
– Фақат бир футболчини ажратиб кўрсатишга тайёр эмасман. Ҳа, Сардорнинг ишлари яхши кетяпти. Лекин, масалан, Чалов ҳам бор. Ёки Дзюбани олайлик, у гол урмаса ҳам, «Зенит»га катта фойда келтиради. Курашади, пас беради...
Маълумот учун, ушбу ғалабадан сўнг «Ростов» 35 очко билан 6-ўринда бормоқда. Жамоа 5-ўриндаги, куни кеча ўзи мағлуб этган «Спартак»дан бир очкога ортда қоляпти. Ростовликлар кейинги турни 20 апрель, шанба куни «Оренбург» майдонида ўтказади.
14-рақам эгаси ўзбекистонлик Элдор Шомуродов РПЛнинг бу мавсумидаги 20та турида қатнашиб, иккита гол ва битта самарали пас муаллифи бўлган. “Замин” янгиликларини “Инстаграм”да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Crocus терактида айбланаётган тожикистонлик Далержон Мирзоевнинг ота-онаси ўғли ҳақида гапирди
Эрон президенти жиддий баёнот берди: «Исроилдан ҳеч нарса қолмайди»
ҲАМАС етакчиси: Исроил Рафаҳга кирса, Фаластин халқи оқ байроқни кўтармайди
Россия дунёдаги биринчи водород ёқилғили автомобилни тақдим этди
Сариқми ёки яшил: қайси турдаги банан фойдалироқ?
Тошкентда 02 кодли авторақамлар тахминан қачон пайдо бўлиши айтилди
Қайси кундалик одатлар иммунитет пасайишига олиб келишини биласизми?
Германияда мактаб ўқувчилари оммавий равишда ислом динини қабул қилмоқда
