Оғир атлетикачи Адҳамжон Эргашев ЖЧда 3 та олтин медални қўлга киритди

^{Фото: Жисмоний тарбия ва спорт вазирлиги}
1-8-июн кунлари Фижи давлатининг Сува шаҳрида оғир атлетика бўйича 20 ёшгача бўлган спортчилар ўртасида жаҳон чемпионати ўтказилаётгани ҳақида хабар хабар берган эдик.

Ўтган йили пойтахтимиз мезбонлик қилган ёшлар ўртасидаги жаҳон биринчилигида олтин медални қўлга киритган Адҳамжон Эргашев бугун чемпионликни муносиб ҳимоя қила олди.

Эслатиб ўтамиз ўтган йилнинг кузида халқаро федерация вазн тоифаларини ўзгартиришга қарор қилган эди. Шундай қилиб Эргашев жаҳон чемпионатида биринчи марта -67 кг гуруҳида шоҳсупага кўтарилди. У ўзининг энг яқин таъқибчиси, кумуш медал соҳиби туркиялик Муҳаммад Фурқон Ўзбекни 7 килограммга ортда қолдирди.

Енгил вазнларда бундай фарқ етарлича катта устунлик ҳисобланади. Яна бир аҳамиятли жиҳати даст кўтаришда ҳам силтаб кўтаришда ҳам рақибларига имконият қолдирмаган Адҳамжон 3 та олтин медални қўлга киритди. Ушбу вазн тоифаси бронза медали россиялик Зулфат Гараевга насиб этди.

Оғир атлетика бўйича ёшлар ўртасида жаҳон чемпионати натижалари:

Эркаклар, -67 кг.:
1. Адҳамжон Эргашев (Ўзбекистон) – 314 кг (141 кг + 173 кг)
2. Муҳаммад Фурқон Ўзбек (Туркия) – 307 кг (135 кг + 172 кг)
3. Зулфат Гараев (Россия) – 300 кг (137 кг + 163 кг)

Энг муҳими Адҳамжон Эргашев Токио Олимпиадасига йўлланмани қўлга киритиш учун қимматли рейтинг очколарини жамғаришга муваффақ бўлди. “Замин” янгиликларини “Инстаграм”да кузатиб боринг