Вадим Абрамов: Ўзимга қолса, сентябрда Бразилия билан ўйнаган бўлардим

Маълумки, сентябрь ойида Ўзбекистон миллий терма жамоаси йиғин ташкил қилади. Хабарингиз бор, Вадим Абрамов бошчилигидаги терма жамоамиз Тожикистонга қарши ўртоқлик учрашувини ўтказади. Кўпчилик мухлислар эса Ўзбекистоннинг ҳам кучлироқ термалар билан ўйин ўтказишини истаётганлари турган гап. Бу борада гап кетар экан, Вадим Абрамов қуйидаги фикрларни илгари сурди:

- Ўзимга қолса, сентябрда Бразилия билан куч синашган бўлардим. Бироқ ФИФА халқаро тақвимни тузиш чоғида ОФК тасарруфидаги мамлакатларнинг терма жамоаларини ажратиб қўяди. Қолаверса, европаликларнинг ўртоқлик ўйинлари ўрнини босишга мўлжалланган УЕФА миллатлар лигаси турнири бор. Шу сабаб ФИФА кунларида қўҳна қитъадаги терма жамоалар билан учрашиш деярли иложсиз ишдир. Чунки ҳатто футбол даражаси анча кучсиз бўлган термалар билан шундай пайтда ўртоқлик баҳсини ўтказишнинг умуман иложини топа олмайсиз.

Шукурки, шунда ҳам вазиятдан чиқиб, Белоруссия билан ўйин ўтказишга улгурдик. Бугунги кунда Европадаги терма жамоалардан бири билан ўртоқлик ўйинини ўтказиш юзасидан келишиш жуда мушкул иш. Шунинг учун бутун эътиборни бунга қаратиш тўғри бўлмайди. Вазиятдан келиб чиққан ҳолда раҳбариятдан иложи борича кучли рақиб топишни сўрашдан бошқа чорамиз йўқ.

Агар ўсишни мақсад қилган эканмиз, демак кучли рақиблар билан белашишимиз керак бўлади. Бахтга қарши вазият тақозосига кўра, бизга кучлироқ рақибларни топишнинг иложи бўлмаяпти. Қолаверса, бундай ишларда молиявий масала муҳим аҳамият касб этмасдан қолмайди. Шу сабабдан ҳам бутун эътиборимизни ўз ўйинимизни кучайтиришга қаратиб, Ўзбекистон терма жамоасини ЖЧга тайёрлаб борамиз, - деди Абрамов.

Манба: Sports.uz “Замин” янгиликларини “Одноклассники”да кузатиб боринг