Рустам Ашурматов: «Ўзбекистон терма жамоаси ўз ўйинини кўрсата олса, араб жамоалари муаммо туғдирмайди»

^{Фото: ЎФА}
Жанубий Кореянинг «Кванжу» клуби ва Ўзбекистон терма жамоаси ҳимоячиси Рустам Ашурматов терма жамоанинг ноябрь ойидаги ўйинлари олдидан ўз фикрлари билан ўртоқлашди.

- "Кайфиятим яхши, жамоадошларим билан кўришгандан кейин ундан ҳам яхшиланди. Жисмоний ҳолатимни зўр дея олмайман. Сабаби октябрь ойидаги йиғиндан сўнг Жанубий Кореяга қайтмадим ва шу ерда шуғулландим. «Бунёдкор» ва «Қўқон-1912» клублари машғулотларида қатнашдим. Ўйинларга қадар жисмоний ҳолатимни яхшилаб олишга ҳаракат қиламан.

Тўғри, араб жамоалари билан ўйнаш қийин, бироқ Ўзбекистон терма жамоаси ҳар қандай рақиб билан ўйнай олади. Ўз ўйинимизни кўрсацак, муаммо бўлмайди деб ўйлайман.

«Кванжу»нинг мавсумдаги натижаларидан қониқдим десам ҳам бўлади. Чемпионатни 6-ўринда якунладик, авваллари бизнинг жамоа бу поғонага қадар етиб келолмаган. Мураббийлар штаби ва жамоа аъзоларининг кайфияти аъло. Бу йиғиндан кейин Тошкентда қоламан. Бироз дам олгандан кейин клуб билан кейинги мавсум тайёргарлигини бошлайман", - дейди «Кванжу» ҳимоячиси Рустам Ашурматов.

Ўзбекистон терма жамоаси мазкур йиғин доирасида Сурия (12 ноябрь) ва Ироқ (17 ноябрь) терма жамоаларига қарши халқаро ўртоқлик ўйинида иштирок этади.