Nintendo Switch 2 учун яқинда эълон қилинган GRID Legends версияси “яқин орада” чиқиши кутилмоқда. Аниқ сана ҳозирча айтилмади, бироқ Feral Interactive жамоаси Redditдаги мухлислар билан мулоқотда ўйиннинг техник томонларига доир айрим тафсилотларни очиқлади. Бу ҳақда playground.ru хабар беради.
Ишлаб чиқувчиларга кўра, GRID Legends’да док-станция ва портатив режимларда “Графика” ҳамда “Унумдорлик” созламалари бўлади: мос равишда 30 fps ва 60 fps гача. Портатив режимнинг ўзида эса қўшимча “Мувозанатли” ва “Батарея тежаш” пресетлари ҳам тақдим этилиб, ўйинчи кадрлар тезлиги ва тасвир сифати орасида ўзи учун қулай комбинацияни танлай олади.
График эффектлар борасида ҳам чекиниш йўқ: Switch 2 талқинида мобил версиялар ва бошқа консолларда кўрилган томошабоп унсурлар сақланади. Шиналардан чиққан тутун, учқунлар, чиқариш қувуридан отилган аланга чақнашлари ва яна бошқа кўплаб эффектлар ўйинда қолади.
Шунингдек, GRID Legends Nintendo Switch Online орқали тақдим этиладиган GameCube контроллери вариантини ҳам қўллаб-қувватлайди. Аналог тригерлар газ бериш ва тормоз учун ишлаши айтилмоқда — Feral Interactive буларнинг “ҳаммаси синовдан ўтказилиб, текширилганини” таъкидлаган.
