Tom’s Hardware таҳририяти 2026 йил бошига долзарб бўлган энг яхши видеокарталар рейтингини эълон қилди. Мутахассислар фикрича, AMD, NVIDIA ва Intel геймерлар эътиборини тортиш учун курашни давом эттиряпти. Бозорда нархлар яқин ойлар ичида кескин арзонлашиши кутилмагани учун, айни дам янгиланиш ҳақида ўйлаш учун қулай пайт бўлиши мумкин. Бу ҳақда playground.ru хабар беради.
Энг кўп қиррали танлов сифатида AMD Radeon RX 9070 XT кўрсатилди. У NVIDIA GeForce RTX 5070 Ti даражасига яқин унум беради, лекин одатда анча ҳамёнбоп туради. Устига-устак, FSR4 технологияси тасвир сифатини сезиларли яхшилашга ёрдам бериши таъкидланди.
Ўртача нарх тоифасида етакчилик AMD Radeon RX 9070 га берилди: у RTX 5070 дан деярли ортда қолмайди, бироқ 4 GB қўшимча видеохотира билан устунликка эга. Бу эса юқори сифатда ўйнайдиганлар учун муҳим детал. NVIDIA томонида эса экспертлар GeForce RTX 5070 Ti ни алоҳида ажратди — кучли унум ва илғор график имкониятлар бор, аммо нархи рақобатчиланикидан баландроқ.
Оммабоп сегмент учун энг мақбул вариант сифатида NVIDIA GeForce RTX 5060 Ti 16G тан олинди. 16 GB хотира ва NVIDIA DLSS 4 қўллови ҳисобига у барқарор ва силлиқ геймплейни таъминлайди ҳамда тезлик бўйича Radeon RX 9060 XT дан устунроқ экани қайд этилди. Тежамкорроқ харидорларга эса Radeon RX 9060 XT тавсия қилинди: у QHD форматини ишончли тортади ва FSR4 ни қўллаб-қувватлайди.
Энг арзон ечим сифатида NVIDIA GeForce RTX 5060 тилга олинди — FHD ўйинлари учун қулай, бироқ оғир лойиҳаларда 8 GB хотира етишмаслиги мумкин. Бюджет йиғилмалар учун эса Intel ARC B570 тавсия этилди: 10 GB видеохотира, Intel XeSS қўллови ва паст энергия талаби уни эски қувват блоклари билан ҳам мос вариантга айлантиради.
“Zamin”ни Telegram'да ўқинг!
