Echo Foundry Interactive мусиқий ритм-ўйинлар жанрида янги лойиҳа — Sound System’ни тақдим этди. Лойиҳа устида аввал Guitar Hero, DJ Hero ва Band Hero каби классик серияларни яратишда қатнашган мутахассислар ишлаётгани айтилмоқда. Муаллифлар уни жонли ижро, мусобақа руҳи ва ҳамжамият яратадиган контентга таянган “янги авлод платформаси” сифатида кўрмоқда. Бу ҳақда playground.ru хабар беради.
Релиз пайтида ўйин гитара, бас-гитара ва вокал йўналишларини қўллаб-қувватлайди, кейинчалик барабан ҳамда клавишли чолғулар ҳам қўшилиши режалаштирилмоқда. Gameplay икки режимга бўлинади: Classic — вақтни “юмшоқроқ” талаб қилади ва қўшиқни муваффақиятсизлик билан якунлаш механикасини ўчиради, Pro эса тажрибали ўйинчилар учун максимал мураккабликка мўлжалланган. Энг катта урғу эса ички editor’га берилган — фойдаланувчилар исталган куй учун ноталар йўлагини ўзлари туза олади.
Sound System шартли бепул моделда тарқатилади: базавий версия чекланган треклар тўпламини беради ва у вақти-вақти билан янгиланиб туради. 34,99 доллар эвазига тўлиқ нашрни олиш мумкин — унда стартдаги 60 та композиция ҳамда турли ички бонуслар очилади. Қўшимча қўшиқлар алоҳида сотилади, нархи тахминан 1 доллар бўлиши кутилмоқда. Дастлабки ижрочилар рўйхатидан Drist, Graveyard BBQ ва Brian Kahanek каби, 2000-йиллар бошидаги ритм-ўйинлар мухлисларига таниш номлар жой олади.
Ўйин билан бирга Drakong компанияси махсус InfinaKore Telecaster Edition контроллерини ҳам кўрсатди. Гитара модулли тузилма ва мураккаб техникаларни қулайроқ ижро этиш учун қайта ишланган бошқарув крестовинаси билан ажралиб туради. Ишлаб чиқувчилар Sound System олдинги контроллерлар, жумладан Riffmaster ва Rock Band 4 асбоблари билан ҳам мос келишини тасдиқлади. Ўйиннинг PC версияси 2026 йил баҳорига мўлжалланган, PlayStation, Xbox ва Nintendo Switch учун эса кейинроқ чиқади.
“Zamin”ни Telegram'да ўқинг!
