Россиянинг Калуга шаҳридаги собиқ «Volkswagen» заводида «Тенет» брендининг янги T4L кроссоверини ишлаб чиқариш йўлга қўйилмоқда. Ушбу модель бренднинг энг оммабоп автомобилларидан бири бўлган T4 моделининг кенгайтирилган ва янада амалий версияси ҳисобланади. Бу ҳақда Ixbt.com хабар беради.
Янги автомобилнинг асосий ўзига хослиги унинг ўлчамларида намоён бўлади. Кузов узунлиги 186 мм га, баландлиги эса қарийб 50 мм га ошган.
Ғилдираклар базасининг 40 мм га кенгайиши ҳисобига орқа йўловчилар учун жой кўпайган ва юкхона ҳажми 475 литрга етказилган.
Техник жиҳатдан кроссовер 147 от кучига эга 1,5 литрли турбомотор ва 6 поғонали роботлашган узатмалар қутиси билан жиҳозланган. Автомобиль фақат олди узатмали бўлиб, ёқилғи сарфи шаҳар ташқарисидаги циклда 100 км масофа учун 6,5 литрни ташкил этади.
Салонда замонавий технологияларга алоҳида эътибор қаратилган. Ҳайдовчи учун 10,25 дюймли рақамли панел, худди шундай ўлчамдаги мультимедиа тизими ҳамда иқлим назоратини бошқариш учун алоҳида 8 дюймли сенсорли экран ўрнатилган.
Тизим «Apple CarPlay» ва «Android Ауто» дастурларини қўллаб-қувватлайди.
Ишлаб чиқарувчи автомобилни маҳаллий шароитларга мослаштириш чораларини кўрган. Кузов ва яширин бўшлиқлар қўшимча равишда мум билан ишлов берилади, пастки қисми эса коррозияга қарши ва шовқин ўтказмайдиган материаллар билан ҳимояланади.
Ҳозирча янги моделнинг нархи эълон қилинмаган.
“Zamin”ни Telegram'да ўқинг!
