Хитойнинг сунъий интеллект соҳасидаги етакчи лабораторияларидан бири бўлган DeepSeek ўзининг илк венчур инвестиция босқичини ўтказиш бўйича музокаралар олиб бормоқда. Financial Times ва Bloomberg хабарларига кўра, компаниянинг бозор қиймати бир неча ҳафта ичида 20 миллиард доллардан 45 миллиард долларгача кўтарилган. Бу ҳақда Techcrunch.com хабар беради.
DeepSeek 2025-йил бошида АҚШнинг OpenAI ва Anthropic каби гигантлари билан солиштирганда анча кам ресурс ва маблағ эвазига ўқитилган йирик тил моделини тақдим этиб, катта шуҳрат қозонди. Компания ўз моделларини Hugging Face платформаси орқали очиқ кодли шаклда тақдим этиб, мантиқий фикрлаш ва дастурлаш соҳаларида дунёдаги энг илғор технологиялар билан рақобатлашмоқда.
Компания асосчиси, миллиардер Лианг Венфенг илгари ташқи инвестицияларни жалб этмаган. Бироқ, рақобатчилар томонидан ходимларни жалб қилиш ҳолатлари кўпайгани сабабли, у ходимларга акциялар улушини бериш мақсадида маблағ йиғишга қарор қилди. Ушбу инвестиция босқичига Хитойнинг давлат инвестиция жамғармаси етакчилик қилиши кутилмоқда.
Хитой АҚШ технологиялари, хусусан, чиплар тақчиллигини енгиб ўтиш учун маҳаллий сунъий интеллект ечимларини қўллаб-қувватламоқда. DeepSeek моделлари Huawei компаниясининг чипларида ишлаш учун оптималлаштирилган бўлиб, бу тандем Хитойнинг технологик мустақиллигини таъминлашда муҳим аҳамият касб этади. Шунингдек, Тенcент ва Алибаба компаниялари ҳам ушбу инвестиция жараёнида иштирок этиши мумкинлиги айтилмоқда.
“Zamin”ни Telegram'да ўқинг!
