OpenAI компанияси ChatGPT фойдаланувчиларининг хавфсизлигини таъминлаш мақсадида Трустед Контакт номли янги функцияни ишга туширди. Ушбу янгилик фойдаланувчи ўзига зарар етказиш ниятини билдирган тақдирда, унинг яқинларига автоматик тарзда огоҳлантириш юбориш имконини беради. Эндиликда катталар ўз ҳисобларига ишончли шахсни бириктириб қўйишлари мумкин. Бу ҳақда Techcrunch.com хабар беради.
Агар сунъий интеллект билан суҳбат жараёнида хавфли ҳолатлар аниқланса, ChatGPT фойдаланувчини ушбу шахс билан боғланишга чақиради. Шу билан бирга, танланган яқин кишига электрон почта, СМС ёки илова орқали хабар юборилади. Компания фойдаланувчи махфийлигини сақлаш мақсадида хабарларда суҳбатнинг батафсил мазмунини ошкор қилмасликка қарор қилди.
Мазкур қадам OpenAI компаниясига нисбатан билдирилган танқидлар ва суд даъволари фонида амалга оширилмоқда. Аввалроқ баъзи оилалар ChatGPT яқинларининг ўз жонига қасд қилишига сабабчи бўлганини даъво қилган эди. Ҳозирда компания ушбу хавфли сигналларни автоматлаштирилган тизим ва инсонлардан иборат хавфсизлик гуруҳи ёрдамида назорат қилади.
Компания вакилларининг сўзларига кўра, хавфсизлик бўйича билдиришномалар бир соатдан камроқ вақт ичида кўриб чиқилади. Трустед Контакт функцияси ихтиёрий характерга эга бўлиб, у ўтган йили жорий этилган ота-оналар назорати тизимининг мантиқий давоми ҳисобланади. OpenAI келгусида ҳам шифокорлар ва тадқиқотчилар билан ҳамкорликда AI тизимларининг инқирозли вазиятлардаги жавоб чораларини такомиллаштиришни режалаштирмоқда.
“Zamin”ни Telegram'да ўқинг!
