Россиянинг «ВимпелКом» (Beeline бренди) компанияси тармоқни техник модернизация қилиш ва бешинчи авлод алоқа тизимини синовдан ўтказишни бошлаганини эълон қилди. 2026-йил 18-майдан бошлаб Россиянинг 11 та шаҳрида фойдаланувчиларнинг смартфонларида 5G белгиси пайдо бўлади ва тармоқ номи «bee.test.5G» га ўзгаради. Бу ҳақда Ixbt.com хабар беради.
Синовлар дастлаб Благовешенск, Владивосток, Грозний, Калининград, Москва, ЯО, Петропавловск-Камчатский, Санкт-Петербург, Черкесск, Южно-Сахалинск ва Якутск шаҳарларида ўтказилади. Ушбу функция 5G технологиясини қўллаб-қувватлайдиган ва тегишли дастурий созламаларга эга бўлган қурилмалар эгалари учун автоматик ҳамда бепул тарзда фаоллашади.
Компания вакилларининг таъкидлашича, ушбу босқичда интернет тезлиги ва қамров зонаси ўзгаришсиз қолади. Лойиҳанинг асосий мақсади — частота спектрига оид тартибга солувчи масалалар ҳал этилгандан сўнг, 5G тармоғини кенг кўламда ишга туширишга тайёргарлик кўриш ва фойдаланувчилардан фикр-мулоҳазаларни йиғишдир.
Beeline бош директори Сергей Анохиннинг сўзларига кўра, бу қадам тармоқ инфратузилмасини ривожлантириш ва мижозлар қурилмаларини янги авлод алоқасига тайёрлаш учун муҳим сармоядир. Фойдаланувчилардан қўшимча ҳаракатлар ёки тўловлар талаб қилинмайди, чунки 5G имкониятлари аллақачон мавжуд тариф режаларига киритилган.
“Zamin”ни Telegram'да ўқинг!
