Американинг Walmart савдо гиганти ўзининг Онн шоъба бренди остида Android 14 операцион тизимида ишловчи ўта арзон планшетлар линиясини сотувга чиқарди. Тақдимотнинг асосий жиҳати агрессив нарх сиёсати бўлди: олтита янги қурилманинг умумий қиймати битта флагман iPad Pro нархидан ҳам арзонроқдир. 9to5Google нашрининг қайд этишича, олтита гаджетдан бештасининг нархи 200 доллардан паст. Бу ҳақда Ixbt.com хабар беради.
Линиядаги энг ҳамёнбоп қурилма Онн Коре 7 бўлиб, у бор-йўғи 97 доллар этиб белгиланган. Бу маблағ эвазига харидор 7 дюймли ИПС ЛКД дисплей, 4 GB тезкор ва 64 GB доимий хотирага эга бўлади. Қурилманинг хотирасини микроСД картаси ёрдамида кенгайтириш мумкин. Ишлаб чиқарувчининг таъкидлашича, ушбу ихчам гаджет бир марта қувватланиш орқали 10 соатгача ишлай олади.
Стандарт сериядаги йирикроқ моделлар — Онн Коре 8.1 (138 доллар) ва Онн Коре 11 (167 доллар) ҳам тақдим этилди. 11 дюймли модел ўз ўлчамлари билан базавий iPad қурилмасига яқин бўлиб, 6 GB тезкор хотира ва 128 GB ички хотира билан жиҳозланган. Шунингдек, бренд болалар учун махсус 8 ва 11 дюймли версияларни мос равишда 118 ва 136 доллардан сотувга чиқарди.
Янги коллекциянинг флагмани Онн Pro планшети бўлиб, унинг чакана нархи 288 долларни ташкил этади. Қурилма 13,2 дюймли ИПС ЛКД экран, 8 GB тезкор хотира ва 256 GB доимий хотира билан таъминланган. Гаджет MediaTek компаниясининг 2,6 ГГс частотали саккиз ядроли процессорида ишлайди. iPad Pro моделидан фарқли ўлароқ, ушбу қурилма жамланмасида ҳимоя ғилофи ва электрон қалам (стилус) бепул тақдим этилади.
“Zamin”ни Telegram'да ўқинг!
