Россияда 2026-йил якунига қадар тиббий ҳужжатлар ва маълумотномаларни онлайн буюртма қилиш сервисининг бутун мамлакат бўйлаб жорий этилиши режалаштирилмоқда. Бу ҳақда Россия Федерацияси соғлиқни сақлаш вазири ўринбосари Вадим Ванков Давлат думасидаги чиқиши чоғида маълум қилди. Бу ҳақда Ixbt.com хабар беради.
Ҳозирги вақтда Рақамли ривожланиш вазирлиги билан ҳамкорликда ишлаб чиқилган ушбу лойиҳа Тюмен вилояти ва Чувашистон Республикасида синов тариқасида амалга оширилмоқда. Янги ташаббуснинг моҳияти шундаки, зарур ҳужжатлар беморнинг электрон тиббий картасидаги (ЭТК) мавжуд маълумотлар асосида автоматик равишда шакллантирилади.
Масофадан туриб буюртма қилиш мумкин бўлган ҳужжатлар рўйхатига фуқаролар илгари поликлиникаларга шахсан бориб, навбат кутишига тўғри келган энг оммабоп маълумотномалар киритилади. Тизим орқали турли тиббий хулосалар ва касаллик варақаларини сўраш имконияти яратилади.
Вадим Ванковнинг таъкидлашича, вазирликнинг асосий мақсади одамларни шунчаки қоғоз олиш учун тиббиёт муассасасига бориш мажбуриятидан бутунлай халос қилишдир. Бутун жараён рақамли форматга ўтказилади: фуқаро давлат хизматлари порталига кириб, тегишли электрон сўровни шакллантириши кифоя.
Тизим томонидан автоматик ишлов берилгандан сўнг, тайёр ҳужжат электрон кўринишда аризачига Max миллий мессенжери орқали тезкорлик билан юборилади. Бу эса соғлиқни сақлаш тизимида бюрократияни камайтириш ва рақамли технологияларни кундалик ҳаётга татбиқ этиш йўлидаги муҳим қадамдир.
“Zamin”ни Telegram'да ўқинг!
