Amazon компанияси АҚШ Федерал алоқа комиссиясига (ФКК) Глобалстар сунъий йўлдош операторини сотиб олгандан сўнг, Apple компаниясига тегишли улушга ҳам эгалик қилишини маълум қилди. Гап Глобалстар акцияларининг 20 фоизи ҳақида бормоқда, бу улуш Apple'га iPhone смартфонлари учун сунъий йўлдош алоқасини кенгайтириш бўйича келишув доирасида берилган эди. Бу ҳақда Ixbt.com хабар беради.
Айнан Глобалстар тармоғи мобил алоқа қамрови бўлмаган жойларда iPhone фойдаланувчилари учун Эмергенкй СОС функциясини таъминлаб келади. Apple аввалроқ ушбу ҳамкорликка 300 миллион доллар, кейинчалик эса инвестициялар ҳажмини 1,1 миллиард долларгача оширган эди. Бунинг эвазига Глобалстар ўз сунъий йўлдош қувватининг 85 фоизини iPhone фойдаланувчиларига хизмат кўрсатиш учун ажратиш мажбуриятини олган.
ФККга тақдим этилган ҳужжатларга кўра, 11,6 миллиард долларлик ушбу йирик келишув бир неча босқичда амалга оширилади. Amazon дастлаб Глобалстарни махсус ташкил этилган Грапефруит Акқуиситион Суб ИИ, ЛЛК шоъба корхонаси билан бирлаштиради, сўнгра Apple улушини тўлиқ қабул қилиб олади. Amazon ушбу харид iPhone учун мавжуд сунъий йўлдош хизматларига халақит бермаслигини алоҳида таъкидлади.
Amazon ушбу инфратузилмадан анча кенгроқ мақсадларда фойдаланишни режалаштирмоқда. Компания янги авлод Д2Д (директ-то-девисе) тармоғини яратишни мақсад қилган. Бу технология сунъий йўлдошларнинг оралиқ терминалларсиз тўғридан-тўғри смартфонлар ва бошқа мобил қурилмалар билан боғланишини таъминлайди.
Ҳозирда смартфонлар учун сунъий йўлдош алоқаси бозори йирик технологик гигантлар ўртасидаги янги рақобат майдонига айланмоқда. Apple ва Amazon'дан ташқари, SpaceX ва Google ҳам ўз лойиҳаларини фаол ривожлантирмоқда. Бу келишув сунъий йўлдош алоқаси эндиликда фақат фавқулодда ҳолатлар учун эмас, балки глобал мобил тармоқнинг ажралмас қисмига айланиб бораётганини кўрсатади.
“Zamin”ни Telegram'да ўқинг!
