Когнитион стартапи асосчиси ва бош директори Скотт Ву яқинда ўзининг икки йиллик компанияси 26 миллиард доллар баҳо билан 1 миллиард доллар инвестиция жалб қилганидан сўнг яна диққат марказига тушди. Когнитион дунёдаги биринчи ва энг муваффақиятли AI-дастурчилардан бири бўлган Девин лойиҳасининг муаллифи ҳисобланади. Вунинг сўзларига кўра, Девин вазифаларни бошидан охиригача мустақил бажара олади, бу эса дастурий таъминот ишлаб чиқишда янги даврни бошлаб беради. Бу ҳақда Techcrunch.com хабар беради.
Кўпчиликни Девин ўрта даражадаги (Л4) дастурчиларнинг ўрнини эгаллайдими деган савол қизиқтирмоқда. Скотт Ву TechCrunch нашрига берган интервюсида бу саволга ҳам ижобий, ҳам салбий жавоб берди. "Биз ҳеч қачон инсонлар ўрнини босиш ҳақида ўйламаганмиз. Гарчи кўпчилик шундай сценарийларни тахмин қилаётган бўлса-да, бизнинг қарашимиз бутунлай бошқача", — дея таъкидлади у.
Технология оламида сунъий интеллект сабабли иш ўринлари қисқараётган бир пайтда, Ву дастурчилар ишсиз қолишини истамаслигини билдирди. Унинг ўзи тўққиз ёшидан бери код ёзади ва болалигида кўплаб математика ҳамда дастурлаш мусобақаларида ғолиб чиққан. Ву ҳатто Скале AI асосчиси Александр Ванг каби бошқа машҳур вундеркиндлар билан бир даврада улғайган.
Вунинг фикрича, Девин — бу дастурчининг ўрнини босувчи восита эмас, балки унинг энг яқин ёрдамчисидир. У ўз иш столида компьютер ушлаб турган юmsҳоқ ўйинчоқни кўрсатиб, уни Девин рамзи деб атади. "Бу сизга кўпроқ нарсаларни яратишда ёрдам берадиган дўстингиздир", — дейди у.
Якунда Скотт Ву сунъий интеллект дастурлаш жараёнидаги завқни тортиб олмаслиги кераклигини айтди. Унинг сўзларига кўра, дастурчилар ниманидир нолдан яратишни ва ўз ғояларини маҳсулотга айлантиришни яхши кўрадилар. Девин каби агентлар эса фақатгина мураккаб техник жараёнларни осонлаштириб, инсон ва якуний маҳсулот ўртасидаги навбатдаги қулай қатлам бўлиб хизмат қилади.
“Zamin”ни Telegram'да ўқинг!
