Беҳи — нафақат мазали ва фойдали мева, балки терини парвариш қилишда ҳам табиий шифобахш манба ҳисобланади. Унинг таркибида А, С, Е, К, В гуруҳи витаминлари, шунингдек темир, руҳ, селен, мис, фосфор каби минераллар жуда кўп. Бу моддалар терини озиқлантиради, намликни сақлайди, уни соғлом ва ёш ҳолда сақлашга ёрдам беради.
Беҳидаги кверсетин моддаси кучли антиоксидант бўлиб, тери ҳужайраларини эркин радикаллардан ҳимоя қилади. Бу модда С витамини билан бирга ишлаб, терини тиклаш ва яллиғланишни камайтиришда муҳим ўрин тутади.
Унинг мунтазам истеъмоли теридаги қизаришни бартараф этади, акне ва доғларни камайтиради, ажинлар пайдо бўлишини секинлаштиради. Шу билан бирга, беҳи тешикларни торайтиради, қора нуқталарни камайтиради ва теридаги ёриқ ҳамда яраларни тез даволашга ёрдам беради.
Беҳи — табиий намлагич, тиниқлаштирувчи ва ҳимоя қилувчи восита. Унинг шифобахш хусусиятлари туфайли, ҳозирда кўплаб косметик маҳсулотлар таркибига ҳам қўшилмоқда.
«Замин»ни Telegram’да ўқинг!
