Yangi Land Rover Defender taqdim etildi: dizayn va texnologiya inqilobi!

Britaniyaning mashhur avtomobil ishlab chiqaruvchisi Land Rover o‘zining eng afsonaviy modellaridan biri — Defender'ning modernizatsiya qilingan versiyasini rasman namoyish qildi. Yangi Defender nafaqat tashqi ko‘rinishidagi yengil o‘zgartirishlari, balki zamonaviy va innovatsion texnologiyalari bilan ham diqqatni jalb qilmoqda.

Tashqi dizayn jihatdan avtomobilning asosiy faralari yangilandi. Ularning dizayni sezilarli darajada o‘zgarib, markaziy elementlari avvalgidan kichikroq o‘lchamga keltirilgan. Orqa tomondagi chiroqlar esa yengil to‘qroqlashtirilgan (tonirovkalangan) ko‘rinishga ega bo‘ldi, bu esa Defender'ga sportcha va zamonaviy ko‘rinish baxsh etadi.

E’tiborli jihatlardan biri shundaki, endilikda barcha komplektatsiyalarda qora old panjara standart tarzda o‘rnatiladi. Shu bilan birga, old va orqa bamperlarning rangiga ham alohida e’tibor berildi. Ular endi kumushrang yoki kulrang tuslarda bo‘yaladi va bu bilan avtomobilning tashqi ko‘rinishini yanada zamonaviy va e’tiborni jalb qiluvchi qiladi.

Salonga nazar tashlaydigan bo‘lsak, asosiy va muhim yangilik bu yangi avlod 13,1 dyuymli katta sensorli ekranli multimedia tizimidir. Ushbu tizim yuqori sezgirlikka va zamonaviy interfeysga ega bo‘lib, haydovchiga qulaylikni va yuqori darajadagi boshqaruv imkoniyatlarini taqdim etadi.

Yangi Defender modelida xavfsizlik masalalari ham alohida ahamiyatga ega bo‘ldi. Ayniqsa, haydovchi e’tiborini kuzatish uchun maxsus infraqizil kamera joriy etildi. U rul kolonkasiga yashirin tarzda o‘rnatilgan bo‘lib, haydovchi charchagan yoki diqqati chalg‘igandan darhol ogohlantirish signallari berib, ehtimoliy avariyalarning oldini olishga yordam beradi. Kameraning ishlash tartibini haydovchi o‘z xohishiga ko‘ra sozlashi yoki butunlay o‘chirib qo‘yishi ham mumkin.

Bundan tashqari, birinchi marta Land Rover o‘zining Defender modelini maxsus yo‘lsiz (off-road) sharoitlarga moslashgan adaptiv kruiz-nazorat tizimi bilan jihozladi. Bu texnologiya o‘ta murakkab yo‘lsiz releflarda haydash jarayonini maksimal darajada qulaylashtiradi. U avtomatik ravishda avtomobilning tezligini va oldindagi to‘siqlarga bo‘lgan masofani nazorat qilib, haydovchiga qiyin vaziyatlarda ham oson boshqaruv imkoniyatini yaratadi.

Dvigatellar borasida Land Rover hozircha aniq o‘zgarishlar haqida ma’lumot bermadi. Shuning uchun mutaxassislar avvalgi ishonchli dvigatellar saqlanib qolishi mumkinligini taxmin qilmoqda. Ularning orasida quyidagilar bor:

3,0 litrli olti silindrli dizel dvigatel (246 yoki 345 ot kuchiga ega);
2,0 litrli benzinli plug-in gibrid motor (296 ot kuchi, elektrda harakatlanish zaxirasi 48 km gacha);
5,0 litrli V8 benzinli dvigatel (419, 493 va 518 ot kuchi).

Flagman hisoblangan Octa versiyasi esa avvalgi yuqori darajadagi texnik imkoniyatlari bilan ishlab chiqarilishda davom etadi.

Yevropa bozorida yangilangan Defender'ning boshlang‘ich narxi taxminan 70 ming dollardan boshlanishi ma’lum qilindi. Bu orqali Land Rover o‘zining eng mashhur modellaridan biri bilan raqobatda ustunlikni saqlab qolishga harakat qilmoqda. Yangi Defender nafaqat yo‘lda, balki yo‘lsiz sharoitlarda ham haydovchilarning ishonchli va qulay sherigiga aylanishi mumkin.