Yaponiyaning mashhur Toyota kompaniyasi yangi Corolla modelini ommaga tanishtirdi. Taqdimot onlayn formatda o‘tkazilib, ko‘pchilik tomoshabinlar avvaliga Lexus LFR superkarini kutishgan bo‘lsa-da, kompaniya butunlay kutilmagan yangilikni taqdim etdi — bu safar diqqat markazida legendar Corolla’ning yangi konsepti bo‘ldi.
Rasmiy ravishda u “konsept” sifatida e’lon qilingan bo‘lsa-da, kuzov shakli va dizayn elementlariga qaraganda, avtomobil seriyali ishlab chiqarishga deyarli tayyor ekani ma’lum bo‘ldi. Tashqi ko‘rinishdagi yangilanishlar nafaqat zamonaviy, balki sport uslubidagi estetik yo‘nalish bilan ham ajralib turadi.
Dizaynerlar e’tiborini tortgan jihatlar orasida piksel shaklidagi kunduzgi yoritgichlar, “o‘rdak dumli” spoyler va egiluvchan oynalar chizig‘i alohida ajralib turadi. Bu elementlar Corolla’ga ilgari kuzatilmagan sport ruhini bag‘ishlagan.
Qiziq jihati, avtomobilning old qismida yoqilg‘i baki joylashuvi elektr yoki gibrid tizimdan foydalanish ehtimolini bildirmoqda. Mutaxassislar fikricha, Toyota hali to‘liq elektr quvvatiga o‘tish haqida yakdil qaror qabul qilmagan. Kompaniya ichki yonish dvigatelli versiyani ham saqlab qolishi mumkin, chunki Corolla nomi Toyota tarixidagi eng mashhur va taniqli brendlardan biri hisoblanadi.
Shu boisdan, ishlab chiqaruvchi modelni faqat elektr variant sifatida taqdim etishga shoshilmasligi mumkin. Bu qaror orqali kompaniya ham an’anaviy, ham zamonaviy texnologiyalarni uyg‘unlashtirishni ko‘zlayotgani ko‘rinadi.
Yangi Corolla modeli rasman 2025-yil 29-oktyabrda Tokioda bo‘lib o‘tadigan Japan Mobility Show ko‘rgazmasi doirasida namoyish etiladi. Tadbir davomida Toyota vakillari avtomobiling texnik xususiyatlari, quvvat tizimi va unda qaysi turdagi dvigatel — gibrid yoki to‘liq elektr — ishlatilayotgani haqida batafsil ma’lumot beradi.
Avtosanoat tahlilchilari ta’kidlashicha, yangi Corolla kompaniyaning “o‘tish davri” strategiyasida muhim o‘rin tutadi. U nafaqat yangi texnologiyalarni sinovdan o‘tkazish, balki klassik modelni zamonaviy qiyofada qayta tiklash vazifasini ham bajaradi.
Toyota’ning bu qadami nafaqat Yaponiya, balki butun dunyodagi muxlislar e’tiborini qozondi — chunki Corolla bir necha avlod davomida ishonch, barqarorlik va qulaylik ramziga aylangan avtomobil sifatida mashhurdir.
“Zamin”ni Telegramʻda oʻqing!
