28 aprel kuni dunyodagi yetakchi elektromobil ishlab chiqaruvchilardan biri — BYD birinchi chorak moliyaviy natijalarini eʼlon qildi. Kompaniya hisobotiga koʻra, sof foyda 4,1 milliard yuanni (taxminan 600 million dollar) tashkil etgan. Bu koʻrsatkich oʻtgan yilning shu davriga nisbatan 55,4 foizga kamaygan boʻlib, 2022 yilning ikkinchi choragidan buyon eng past natija sifatida qayd etildi.
Shuningdek, kompaniyaning umumiy tushumi 150,2 milliard yuan (22 milliard dollar) darajasida shakllangan boʻlib, bu ham yillik hisobda 11,8 foizlik pasayishni koʻrsatmoqda. Bunday dinamika bozor ishtirokchilari va tahlilchilar diqqatini oʻziga qaratdi.
Mutaxassislar fikricha, bunday zaif koʻrsatkichlarning asosiy sababi — Xitoy ichki bozorida elektromobillar va gibrid avtomobillarga boʻlgan talabning susayishi bilan bogʻliq. Xususan, The Wall Street Journal maʼlumotiga koʻra, Xitoy yengil avtomobillar assotsiatsiyasi statistikasida yanvar oyida elektr va gibrid mashinalar savdosi 20 foizga kamayib, 596 ming donaga tushgan. Bu esa 2024 yil fevral oyidan beri ilk pasayish sifatida baholanmoqda.
Tahlilchilar taʼkidlashicha, mazkur holat davlat tomonidan taqdim etilgan subsidiyalar muddatining yakunlanishi bilan ham bogʻliq. Shuningdek, 2026 yil boshidan yangi energiya manbalarida ishlaydigan transport vositalari uchun soliq imtiyozlarining bosqichma-bosqich bekor qilinishi ham xaridorlarni kutish pozitsiyasiga oʻtishga majbur qilgan.
Yana bir muhim omil sifatida kichik yurish zaxirasiga (100 km dan kam) ega gibrid batareyalar ishlab chiqarishga davlat qoʻllab-quvvatlovining qisqarishi koʻrsatilmoqda. Bu esa aynan shu segmentga koʻproq tayangan BYD kabi kompaniyalar uchun sezilarli taʼsir koʻrsatdi.
Bundan tashqari, Xitoy iqtisodiyotida kuzatilayotgan makroiqtisodiy bosimlar ham vaziyatni murakkablashtirmoqda. Iqtisodiy oʻsish surʼatlarining sekinlashishi, aholi daromadlarining oʻsishidagi pasayish va ishsizlik darajasining ortishi umumiy xarid qobiliyatiga salbiy taʼsir koʻrsatgan.
Qisqasi, BYD natijalari nafaqat kompaniyaning ichki muammolarini, balki butun elektromobil bozorida kuzatilayotgan oʻzgarishlar va bosimlarni ham yaqqol namoyon etmoqda. Kelgusi choraklarda talab tiklanadimi yoki pasayish davom etadimi — bu savol hozircha ochiq qolmoqda.
