Xitoyning yirik avtomobil ishlab chiqaruvchisi Geely kompaniyasi Ford bilan Ispaniyaning Almussafes shahridagi zavodning Ford Body 3 yigʻuv liniyasini sotib olish boʻyicha kelishuvga erishdi. Ushbu maydoncha kelgusida gibrid va toʻliq elektrlashtirilgan avtomobillarni ishlab chiqarish uchun markazga aylantiriladi. Bu haqda Ixbt.com xabar beradi.
Zavod toʻliq quvvat bilan ishga tushirilgach, yillik ishlab chiqarish hajmi 300 000 donadan oshishi kutilmoqda. Ishlab chiqarish jarayoni Geely kompaniyasining GEA intellektual arxitekturasiga asoslanadi, bu platforma hozirda Geely Galaxy A7 va E5 modellarida muvaffaqiyatli qoʻllanilmoqda.
Loyihaning ichki nomi «135» deb nomlangan boʻlib, u kompaniyaning global elektr avtomobillar qatorini kengaytirish strategiyasining bir qismidir. Dastlabki maʼlumotlarga koʻra, zavod konveyeridan chiqadigan ilk model ixcham elektr krossoveri EX2 boʻlishi mumkin.
Yangi krossover ikki xil akkumulyator sigʻimi — 30,1 va 40,1 kVt·soat bilan taqdim etiladi, bu esa CLTC sikli boʻyicha 310 va 410 kilometrgacha masofa bosib oʻtish imkonini beradi. Shuningdek, Ford kompaniyasi ham ushbu platforma negizida yangi model, jumladan, Puma modelining vorisini yaratish imkoniyatini koʻrib chiqmoqda.
“Zamin”ni Telegramʻda oʻqing!
