"Russo-Balt" brendi oʻzining yangi C55 krossoveri qaysi mashhur modellar bilan raqobatlashishini maʼlum qildi. Kompaniya vakilining soʻzlariga koʻra, oʻlchamlari va narxi boʻyicha Lexus LX 570, BMW X6, Porsche Cayenne hamda Mercedes-Benz GLS avtomobillari ushbu modelning asosiy raqobatchilari hisoblanadi. Bu haqda Ixbt.com xabar beradi.
Yangi krossover texnik jihatdan juda kuchli boʻlishi kutilmoqda. Avtomobil 550 ot kuchiga ega ikkita elektr dvigatel va toʻliq uzatmali tizim bilan jihozlanadi. Eng qiziqarli jihati shundaki, kuzov panellari zanglamaydigan poʻlatdan tayyorlanadi, bu esa avtomobilning uzoq umr koʻrishini taʼminlaydi.
C55 modelining umumiy ogʻirligi 3,5 tonnadan oshmaydi, bu esa uni boshqarish uchun B toifali haydovchilik guvohnomasi yetarli boʻlishini anglatadi. Avtomobilning jihozlanishi ham yuqori darajada: panoramali tom, 20 dyuymli gʻildirak disklari, isitish va ventilyatsiya funksiyali charm oʻrindiqlar hamda 15 dyuymli sensorli displey shular jumlasidandir.
Kompaniya top-versiyada 1000 ot kuchiga ega toʻrtta elektr dvigatel, pnevmatik osma tizim va hatto masofani uzaytiruvchi benzinli generatorni ham taklif qilishni rejalashtirmoqda. Joriy yilning aprel holatiga koʻra, ushbu avtomobilning narxi 8 million rublni tashkil etgan.
“Zamin”ni Telegramʻda oʻqing!
