Great Wall Motors kompaniyasi o‘zining yangi Haval Raptor PLUS krossoveri Xitoy bozorida 15-maydan boshlab sotuvga chiqarilishini e’lon qildi. Model uchun oldindan buyurtmalar 18-apreldan boshlangan bo‘lib, dastlabki narxlar 189,8 ming yuandan boshlanadi. Mutaxassislarning fikricha, chakana savdo boshlangach, ushbu quvvatli gibrid avtomobilning narxi yanada arzonlashishi mumkin. Bu haqda Ixbt.com xabar beradi.
Yangi model o‘zining klassik «kvadrat» dizaynini saqlab qolgan holda o‘lchamlari bo‘yicha sezilarli darajada kattalashdi. Avtomobilning uzunligi 4912 mm, kengligi 1950 mm va balandligi 1905 mm ni tashkil etadi, g‘ildirak bazasi esa 2850 mm ga teng. Bu ko‘rsatkichlar uni o‘lchamlari bo‘yicha deyarli Toyota Land Cruiser 300 bilan bir qatorga qo‘yadi. Xaridorlarga 5 va 7 o‘rinli salon variantlari taklif etiladi.
Avtomobil saloni zamonaviy texnologiyalar bilan boyitilgan. U 15,6 dyuymli 2,5K aniqlikdagi ekran, W-HUD proyeksion displeyi, 12 ta dinamikdan iborat audio tizim va 50 vattli simsiz quvvatlash qurilmasi bilan jihozlangan. Shuningdek, qulaylik uchun 5,4 litrli muzlatgich hamda old o‘rindiqlarning isitish, ventilyatsiya va massaj funksiyalari mavjud.
Texnik jihatdan Haval Raptor PLUS Great Wall Hi4 gibrid tizimi va to‘liq uzatmali (4WD) tizimga asoslangan. 1,5 litrli turbomotor va elektr dvigatellarning umumiy quvvati 449 ot kuchini, aylanish momenti esa 660 N·m ni tashkil etadi. Krossover 100 km/soat tezlikka atigi 5,8 soniyada erishadi.
Model uch xil sig‘imdagi akkumulyatorlar bilan taqdim etiladi: 23,7, 33,7 va 44,7 kVt·soat. WLTC metodikasi bo‘yicha hisoblanganda, avtomobil faqat elektr energiyasi hisobiga 191 kilometrgacha masofani bosib o‘tishga qodir.
“Zamin”ni Telegramʻda oʻqing!
