JLR kompaniyasining yangi bosh direktori PB Balaji ma'lum qilishicha, britaniyalik ishlab chiqaruvchi Chery kompaniyasining Freelander brendi ostidagi avtomobillarni Buyuk Britaniya bozoriga olib kirishiga to'sqinlik qilmaydi. Xitoyda ishlab chiqariladigan ushbu krossoverlar JLR'ning mavjud mahsulotlari bilan raqobatlashmasligi kutilmoqda. Bu haqda Autocar.co.uk xabar beradi.
Freelander 8 modeli may oyi boshida taqdim etilgan bo'lib, u global miqyosda sotiladigan yangi avtomobillar turkumining birinchisi hisoblanadi. Chery kelgusi besh yil davomida har olti oyda yangi modelni taqdim etishni rejalashtirmoqda. Ushbu loyiha ikki kompaniya o'rtasidagi uzoq yillik hamkorlik doirasida amalga oshirilmoqda.
JLR Freelander nomidan foydalanish huquqini Chery'ga litsenziya asosida bergan va dizayn ishlarida ishtirok etgan, biroq avtomobillarni muhandislik jihatidan ishlab chiqish va yig'ish to'liq Xitoy kompaniyasi zimmasida. Dastlabki savdolar Xitoyda boshlanadi, keyinchalik esa eksport masalalari hal etiladi.
PB Balaji Freelander va JLR mahsulotlari o'rtasidagi narx siyosati va pozitsiyalash turlicha ekanligini ta'kidladi. Uning so'zlariga ko'ra, ushbu avtomobillar Discovery va Defender modellari bilan raqobatlashmaydi, aksincha, bozor imkoniyatlarini kengaytirishga xizmat qiladi.
“Zamin”ni Telegramʻda oʻqing!
