Honda kompaniyasi elektromobillarga to‘liq o‘tish bo‘yicha o‘zining avvalgi rejalarini rasman qayta ko‘rib chiqdi. Ilgari avtomobil ishlab chiqaruvchi 2040-yilga kelib faqat elektromobillar va vodorod yoqilg‘isi elementlari bilan ishlaydigan mashinalarni sotish niyatida ekanligini ma’lum qilgan edi, biroq endilikda bu maqsad real emasligi tan olindi. Bu haqda Ixbt.com xabar beradi.
Honda bosh direktori Tosixiro Mibe bozorlardagi noaniqlik va iste’molchilar talabining o‘zgarishi sababli kompaniya ichki yonuv dvigatellaridan (IYD) butunlay voz kechish strategiyasidan qaytganini ma’lum qildi. Uning so‘zlariga ko‘ra, joriy sharoitlar avval e’lon qilingan muddatlarda bunday maqsadga erishishni imkonsiz qilmoqda.
Endilikda Honda gibrid texnologiyalarga ko‘proq urg‘u bermoqchi. Kompaniya 2030-yil martigacha 15 ta yangi avlod gibrid modellarini bozorga chiqarishni hamda yangi kuch qurilmalarini ishlab chiqishga qariyb 4,4 trillion iyen (taxminan 28 milliard dollar) sarmoya kiritishni rejalashtirmoqda.
Yangi qatorda ixcham to‘rt silindrli gibridlar bilan bir qatorda, samaradorligi va dinamikasi oshirilgan yirikroq V6 tizimlari ham paydo bo‘ladi. Shunga qaramay, avtomobil ishlab chiqaruvchi asr o‘rtalariga qadar uglerod neytralligiga erishish maqsadini saqlab qolmoqda, biroq bu yo‘l endi yanada moslashuvchan bo‘ladi.
“Zamin”ni Telegramʻda oʻqing!
