BYD Blade ikkinchi avlod akkumulyator batareyasini demontaj qilish jarayoni jonli efirda namoyish etildi. Bir guruh avtomobil blogerlari akkumulyator blokini ochish uchun bir necha soat davomida elektr arra, bolgarka, temir lom va bolg‘alardan foydalanishdi. Xitoy ijtimoiy tarmoqlari foydalanuvchilari ushbu jarayonni qo‘llanilgan usullar va sarflangan vaqt sababli «shafqatsiz demontaj» deb atashdi. Bu haqda Ixbt.com xabar beradi.
Tashkilotchilarning xabar berishicha, akkumulyatorning ichki elementlariga yetib borish uchun taxminan sakkiz soat vaqt ketgan. Sinov davomida batareyaga ko‘plab zarbalar berilganiga va kesish ishlari olib borilganiga qaramay, qurilmada tutun chiqishi yoki yong‘in holati kuzatilmagan.
Jonli efir izohlarida tomoshabinlar asosan akkumulyator blokining konstruktiv mustahkamligiga e’tibor qaratishdi. Muhokamalarda blokni germetizatsiya qilish usullari, issiqlik izolyatsiyasi materiallari va strukturaviy kuchaytirish texnologiyalari alohida ta’kidlandi.
Demontaj jarayonini o‘tkazgan guruh akkumulyator ichida faqat yelimning notekis surtilishi kabi ahamiyatsiz ishlab chiqarish nuqsonlarini aniqladi. Bu sinov BYD Blade 2.0 texnologiyasining yuqori xavfsizlik darajasini va mexanik ta’sirlarga chidamliligini yana bir bor tasdiqladi.
“Zamin”ni Telegramʻda oʻqing!
