Mercedes-AMG kompaniyasi oʻzining yangi toʻliq elektr uzatmali GT 4-Door Coupe modelini rasman namoyish etdi. Ushbu avtomobil brendning anʼanaviy V8 dvigateli yoki gibrid tizimidan voz kechib, butunlay yangi AMG.EA elektr platformasiga asoslangan. Kuzov turi borasida bahslar davom etmoqda: nomi “toʻrt eshikli kupe” deb atalsa-da, tashqi koʻrinishi fastbekni eslatadi, orqa eshigi koʻtarilishi esa uni liftbekka yaqinlashtiradi. Bu haqda Ixbt.com xabar beradi.
Yangi modelning eng yuqori GT 63 4Matic+ versiyasi uchta elektromotor bilan jihozlangan boʻlib, jami 1153 ot kuchi va 2000 Nm aylanish momentini taqdim etadi. Avtomobil 100 km/soat tezlikka bor-yoʻgʻi 2,1 soniyada erishadi, maksimal tezligi esa 300 km/soatni tashkil qiladi. Kamroq quvvat xohlovchilar uchun 805 ot kuchiga ega GT 55 talqini ham taklif etiladi.
Elektromobil 106 kW·soat sigʻimli akkumulyator va 800 voltli arxitektura bilan taʼminlangan. Bu texnologiya yordamida mashinani 10 foizdan 80 foizgacha atigi 11 daqiqada quvvatlash mumkin, 10 daqiqalik quvvat esa 460 km masofaga yetadi. Umumiy yurish masofasi 700 km atrofida boʻlib, AMG Active Ride Control faol osma tizimi va boshqariluvchi orqa gʻildiraklar avtomobilning manyovrchanligini taʼminlaydi.
Salon qismida 10,2 dyuymli raqamli asboblar paneli, 14 dyuymli multimedia ekrani va yoʻlovchi uchun alohida displey oʻrnatilgan. Haydovchilarga tanish AMG hissiyotlarini qaytarish maqsadida muhandislar V8 dvigateli ovozi imitatsiyasi va virtual uzatmalar qutisi funksiyasini joriy etishgan. Bozorlarda ushbu model asosan Porsche Taycan va Audi e-tron GT bilan raqobatlashadi.
“Zamin”ni Telegramʻda oʻqing!
