AQSH prezidenti Donald Tramp Rossiya va Ukraina o‘rtasidagi mojaroga doir yangi bayonot berdi. Unga ko‘ra, urushni tugatish uchun Donbass mintaqasi “bo‘linishi” kerak va uning katta qismi Rossiya nazoratida qolishi mumkin, deb xabar berdi Reuters.
19-oktyabr kuni Air Force One bortida jurnalistlar bilan suhbatda Tramp “Donbassning ko‘p qismi amalda Rossiya qo‘lida ekanini” ta’kidlab, “mavjud chegaralar shundayligicha qolishi lozim”, deya fikr bildirdi.
«Hammasi qanday bo‘lsa, shunday qolsin. Bu hudud allaqachon bo‘lingan. Menimcha, mintaqaning 78 foizi Rossiya tomonidan egallangan. Keyinchalik ular o‘zaro kelishuvga yetishi mumkin. Ammo hozircha har ikki taraf front chizig‘ida to‘xtashi, uyiga qaytishi va odamlar o‘ldirilishini to‘xtatishi kerak», — dedi Tramp.
Prezidentning ta’kidlashicha, urushni davom ettirish faqat yangi qurbonlar va vayronagarchilikka olib keladi. Shu sababli, Tramp ikki tomonni tezroq to‘xtash va tinch muzokaralarni boshlashga chaqirdi.
Shu bilan birga, u The Financial Times nashrida 19-oktyabr kuni chop etilgan xabarni rad etdi. Ushbu maqolada Tramp Zelenskiy bilan uchrashuvda “butun Donbassni Rossiyaga topshirishni so‘ragani” haqida yozilgan edi. Bu ma’lumotga ko‘ra, u Ukraina rahbarini “aks holda Putin mamlakatni yo‘q qilishi mumkinligi” bilan ogohlantirgani aytilgan.
Tramp bu xabarni “asossiz va bo‘rttirilgan” deb baholadi hamda “bunday gaplar aytilmaganini” ta’kidladi.
Suhbat davomida Amerika rahbari Hindiston haqida ham fikr bildirib, bosh vazir Narendra Modining Rossiya neftini sotib olishni qisqartirish haqida bergan va’dasini esga oldi. «Agar bu va’da bajarilmasa, Nyu-Dehli katta bojlar to‘lashda davom etadi», — dedi Tramp.
Analitiklar fikricha, Trampning bayonoti Ukraina urushi bo‘yicha yangi siyosiy bosqichni boshlashi mumkin. Uning Donbassni bo‘lish taklifi G‘arbda keskin bahs va turli munosabatlarga sabab bo‘lishi kutilmoqda.
Shunday qilib, Donald Trampning bu so‘zlari Ukraina–Rossiya mojarosida yangi diplomatik yo‘l izlash urinishi sifatida talqin qilinmoqda. Prezidentning asosiy fikri — urushni to‘xtatish va tinch muzokaralar uchun zamin yaratishdir.
“Zamin”ni Telegramʻda oʻqing!
