Dunyoning eng yirik moliya derivativlari birjasi bo‘lgan CME Group 8-iyun kuni Nasdaq CME Crypto Index fyucherslarini ishga tushirishini e’lon qildi. Ushbu yangi moliyaviy vosita yettita raqamli aktivni bitta shartnomada birlashtirib, investorlarga kengroq imkoniyatlar taqdim etadi. Bu haqda Cointelegraph.com xabar beradi.
Yangi indeks Bitcoin (BTC), Ethereum (ETH), Solana (SOL), XRP (XRP), Cardano (ADA), Chainlink (LINK) va Stellar (XLM) kabi kriptovalyutalarning bozor kapitallashuvi asosida shakllantirilgan savatni kuzatib boradi. Shartnomalar standart va mikro o‘lchamlarda taklif etiladi hamda muddat tugagach, naqd pul hisob-kitobi orqali yakunlanadi.
CME ma’lumotlariga ko‘ra, joriy yilda kriptovalyuta derivativlari bo‘yicha o‘rtacha kunlik savdo hajmi 43 foizga o‘sgan. Bu holat institutsional investorlarning tartibga solinadigan kripto bozorlariga bo‘lgan qiziqishi ortib borayotganidan dalolat beradi.
Bozor ishtirokchilari, jumladan Kraken, Coinbase va Blockchain.com kabi platformalar ham o‘z derivativ xizmatlarini kengaytirmoqda. Ular Nvidia va Apple kabi aksiyalar hamda turli kripto aktivlar uchun fyuchers savdolarini yo‘lga qo‘yib, an’anaviy va raqamli moliya bozorlari o‘rtasidagi bog‘liqlikni kuchaytirmoqda.
“Zamin”ni Telegramʻda oʻqing!
