Fransiyada ro‘yxatdan o‘tgan Capital B kompaniyasi 13 million yevro (15,2 million dollar) evaziga 192 Bitcoin sotib olganini e’lon qildi. Ushbu xarid natijasida kompaniyaning umumiy aktivlari 3 135 Bitcoin’ga yetdi. Kompaniyaning Bitcoin strategiyasi direktori Alexandre Laizet’ning X ijtimoiy tarmog‘ida ma’lum qilishicha, har bir Bitcoin o‘rtacha 78 948 dollar narxida xarid qilingan. Bu haqda Cointelegraph.com xabar beradi.
Mazkur bitim kompaniya strategik investorlardan, jumladan Blockstream bosh direktori Adam Back va Parijning TOBAM aktivlarni boshqarish firmasi ishtirokida 17,8 million dollar mablag‘ jalb qilganidan bir hafta o‘tib amalga oshirildi. Capital B may oyida Bitcoin xaridlarini ochiq e’lon qilgan to‘rtta kripto-xazina kompaniyasidan biriga aylandi.
Bozordagi faollikka qaramay, Capital B aksiyalari dushanba kungi e’londan so‘ng 2,4 foizga arzonlashib, 0,62 yevro atrofida sotildi. Yahoo Finance ma’lumotlariga ko‘ra, kompaniya aksiyalari yil boshidan buyon 17 foizga, oxirgi bir yil ichida esa 68 foizdan ko‘proqqa pasaygan.
Hozirgi vaqtda Capital B o‘z zaxiralari hajmi bo‘yicha dunyoda 25-o‘rinda turadi. Yevropa miqyosida esa u 3 605 Bitcoin’ga ega bo‘lgan Germaniyaning Bitcoin Group SE kompaniyasidan keyin ikkinchi o‘rinni egallab turibdi.
“Zamin”ni Telegramʻda oʻqing!
