Dushanba kuni Osiyo bozorlaridagi savdolar boshlanishi bilan Bitcoin (BTC) narxi 76 000 dollargacha tushib ketdi. TradingView maʼlumotlariga ko‘ra, so‘nggi uch kun ichida kriptovalyuta qiymati 7 foizga pasayib, uch haftalik eng past ko‘rsatkich bo‘lgan 76 500 dollarni tashkil etdi va may oyi boshidan buyon erishilgan barcha o‘sishlarni yo‘qqa chiqardi. Bu haqda Cointelegraph.com xabar beradi.
Narxlarning pasayishi Bitcoin yaqinda 83 000 dollar atrofida 13 haftalik eng yuqori cho‘qqiga chiqqanidan so‘ng yuz berdi. Ushbu o‘sish spot ETF fondlariga kirib kelgan katta hajmdagi investitsiyalar va AQShdagi qonunchilik jarayonlari bilan bog‘liq optimizm fonida kuzatilgan edi.
Bozordagi kayfiyatning o‘zgarishiga AQSh prezidenti Donald Trumpning Eron bilan bog‘liq bayonotlari sabab bo‘ldi. Trump tinchlik bitimidagi kechikishlar tufayli Eronga nisbatan yangi tahdidlarni eʼlon qilib, "vaqt tugab bormoqda" deya ogohlantirdi. Tahlilchilar AQSh Eronga qarshi yangi harbiy operatsiyaga tayyorgarlik ko‘rayotgan bo‘lishi mumkinligini taxmin qilmoqda.
Geosiyosiy keskinlik kriptobozorda katta miqdordagi likvidatsiyalarga olib keldi. So‘nggi 24 soat ichida kriptovalyuta bozorida jami 677 million dollarlik pozitsiyalar yopildi, shundan 190 million dollari aynan Bitcoin bilan bog‘liq. Shu bilan birga, neft bozorida ham o‘zgaruvchanlik kuzatilib, WTI markali neft narxi bir necha soat ichida 3 foizdan ko‘proqqa qimmatlab, 104 dollargacha yetdi va keyinroq 101 dollargacha tuzatildi.
“Zamin”ni Telegramʻda oʻqing!
