Trezor apparat hamyonlari provayderi oʻzining Trezor Suite ilovasiga stablecoinlar orqali daromad olish funksiyasini integratsiya qildi. Ushbu yangilik murakkabligi va xavfsizlik xatarlari tufayli markazlashmagan moliya (DeFi) sohasidan uzoq yurgan foydalanuvchilar uchun yangi imkoniyatlar ochishi kutilmoqda. Mazkur funksiya Ethereum tarmogʻida qurilgan Morpho protokoli bilan hamkorlikda amalga oshirildi. Bu haqda Cointelegraph.com xabar beradi.
Endilikda foydalanuvchilar USDt va USDC aktivlarini toʻgʻridan-toʻgʻri Trezor Suite orqali Morpho hovuzlariga (vaults) joylashtirishlari mumkin. Buning uchun tashqi hamyonlarni ulash yoki alohida DeFi ilovalaridan foydalanish talab etilmaydi. Barcha tranzaksiyalar, jumladan, mablagʻ kiritish, yechib olish va mukofotlarni olish jarayonlari apparat hamyonining oʻzida xavfsiz tarzda imzolanadi.
Hozirgi bosqichda Trezor foydalanuvchilari Steakhouse Financial tomonidan boshqariladigan USDC Prime va USDT Prime hovuzlaridan foydalanishlari mumkin. Kompaniyaning taʼkidlashicha, daromadlar turli token ragʻbatlantirish dasturlari hisobiga emas, balki Morpho platformasidagi qarz olishga boʻlgan real talab asosida shakllanadi.
Trezor bozorda Ledger kompaniyasidan keyingi ikkinchi yirik oʻyinchi hisoblanadi. Soʻnggi vaqtlarda hamyon ishlab chiqaruvchilari DeFi funksiyalarini oʻz mahsulotlariga integratsiya qilish orqali foydalanuvchi tajribasini soddalashtirishga intilmoqda. Masalan, Ledger allaqachon Kiln orqali Morpho, Aave va Compound kabi protokollar bilan hamkorlikni yoʻlga qoʻygan.
Stablecoin yield strategiyalari hozirda DeFi sohasidagi eng tez rivojlanayotgan yoʻnalishlardan biri boʻlib, foydalanuvchilarga dollar aktivlari orqali passiv daromad olish imkonini beradi. Biroq, mutaxassislar aqlli kontraktlardagi zaifliklar va likvidlik muammolari kabi xavflardan ogohlantirmoqda. Xususan, Vitalik Buterin koʻplab yield mahsulotlari hali ham markazlashgan emitentlarga bogʻliqligini taʼkidlagan.
“Zamin”ni Telegramʻda oʻqing!
