Strategy kompaniyasining imtiyozli aksiyalar orqali moliyalashtirish modeli investorlar orasida jiddiy shubhalarni uygʻotmoqda. Arca kompaniyasining investitsiyalar boʻyicha direktori Jeff Dorman X ijtimoiy tarmogʻidagi postida Strategy vaziyati “nazoratdan chiqib ketganini” taʼkidladi. Uning soʻzlariga koʻra, kompaniyaning taxminan 15 milliard dollarlik imtiyozli aksiyalari yiliga 1,5 milliard dollar dividend toʻlash majburiyatini yuklamoqda. Bu haqda Cointelegraph.com xabar beradi.
Dorman bozor konyunkturasi oʻzgaruvchan boʻlib qolsa, ushbu tuzilmani boshqarish tobora qiyinlashishidan ogohlantirdi. Hozirda Bitcoin (BTC) narxi yil boshiga nisbatan 16 foizga pastroq, yaʼni 73,737 dollar atrofida savdo qilinmoqda. Bu esa kompaniyaning Bitcoin aktivlariga bogʻlangan kapital tuzilmasi uzoq muddatli narx tebranishlariga bardosh bera oladimi degan savolni keltirib chiqarmoqda.
Ekspertning fikricha, Strategy modeli Bitcoin narxi keskin koʻtarilishi va kelajakdagi majburiyatlarni qoplashi haqidagi taxminga asoslangan edi. Kompaniya STRK, STRF, STRD, STRC va STRE kabi besh turdagi imtiyozli aksiyalarni chiqargan boʻlib, ularning har biri turli dividend shartlari va xavf darajasiga ega. Dorman kompaniyaning 2029-yilda muddati tugaydigan obligatsiyalarni qayta sotib olish qarorini “tushunarsiz” deb atadi.
Vaziyat shuni koʻrsatmoqdaki, kompaniya oldida faqat ikkita yoʻl qolishi mumkin: dividendlar uchun Bitcoin sotish yoki dividend toʻlashni toʻxtatish. Har ikki holat ham investorlar va Bitcoin bozori uchun salbiy oqibatlarga olib kelishi mumkin. Strategy bosh direktori Phong Le kompaniya kelajakda Bitcoin sotishi mumkinligini tasdiqladi, biroq umumiy aktivlar hajmi va har bir aksiyaga toʻgʻri keladigan Bitcoin miqdori oshib borishini taʼkidladi.
“Zamin”ni Telegramʻda oʻqing!
