Hujjatda 20 yil o‘g‘il bola bo‘lib kelgan qizning tug‘ilganlik haqidagi guvohnomasi almashtirib berildi

^{Foto: «Xalq so‘zi Onlayn»}
Qashqadaryoda hujjatda 20 yil o‘g‘il bola bo‘lib kelgan qizga o‘z ismi yozilgan guvohnoma berildi, deb xabar beradi «Xalq so‘zi online».

Qashqadaryo viloyati Dehqonobod tumanining tog‘li Duob va Terakli qishloqlari aholisi uchun tuman fuqarolik holati dalolatnomalarini yozish bo‘limi tomonidan o‘tkazilgan sayyor qabulda 20 yildan buyon «Shafoatov Olim» deya qayd etilgan guvohnoma bilan yashab yurgan qiz murojaat qilgan.

Ma’lum bo‘lishicha, bu qiz tug‘ilganida unga yanglishib, «Shafoatov Olim» deb yozilgan guvohnoma berib yuborilgan. Avvalo, ota-onaning bequntligi, qolaversa, tog‘li qishloqning tuman markazidan 180 kilometr uzoqda joylashgani va markazga borish qiyin bo‘lgani sababli bu qizning o‘g‘il bola ismi va familiyasi qayd etilgan tug‘ilganlik to‘g‘risidagi guvohnomasi o‘zgartirilmay qolib ketgan.

«Kech bo‘lsa-da, bu xato to‘g‘rilandi. Biz sayyor qabuldan so‘ng ‘Shafoatov Olim’ guvohnomasi bilan yurgan qizga Shafoatova Muqaddam Ravshan qizi deb qayd etilgan guvohnomani topshirdik. Endilikda bu tog‘ qishloqlarida yiliga ikki marta sayyor qabul o‘tkazishni mo‘ljallayapmiz», — deydi Dehqonobod tumani fuqarolik holati dalolatnomalarini yozish bo‘limi mudirasi Ozoda Ashurova.

Sayyor qabulda turmush qurganiga 4 yil bo‘lgan, shar’iy nikoh orqali yashab kelayotgan kelin-kuyovga qonuniy nikohdan o‘tganligi to‘g‘risidagi, 17 nafar bolaga tug‘ilganligi, 8 oilaga esa nikoh tuzilganligi haqidagi guvohnomalar topshirilgan.

Eslatib o‘tamiz, 2020 yilda Namanganda 80 yoshli otaxon va 77 yoshli onaxonning nikohi 55 yil o‘tib rasmiylashtirilgan, navoiylik fuqaro 19 yoshida tug‘ilganlik haqida guvohnoma olgan edi. “Zamin” yangiliklarini “Telegram”da kuzatib boring