Taniqli insayder “Manchester Siti" Abduqodir Husanov borasida faol muloqot olib borayotganini aytmoqda

Taniqli insayder Fabritsio Romano “Lans” va Oʻzbekiston milliy terma jamoasi himoyachisi Abduqodir Husanovning transferi boʻyicha ma'lumot berdi.

Uning yozishicha, “Manchester Siti” Abduqodir Husanov borasidagi bitimda faol muloqot olib bormoqda.

“'Lans' bilan muzokaralar oʻyinchi tomonidan ham, klub tomonidan ham boshlangan. Hali oldinda koʻplab qadamlar bor, sababi unga koʻplab klublar qiziqmoqda”, - deb yozdi Romano.

Avvalroq Abduqodir Husanov “Manchester Siti”ning yanvar oyidagi trasferlar oynasidagi eng asosiy maqsadlari qatoriga qoʻshilgani haqida xabar berilgandi.

20 yoshli futbolchi ushbu mavsumni muvaffaqiyatli oʻtkazmoqda va hozirda bir necha APL klublari, jumladan “Lester”, “Nyukasl”, “Chelsi”, “Vest Hem” nazariga tushgan. Oʻzbekistonlik futbolchi oʻz pozitsiyasida eng iqtidorli futbolchilardan biri sifatida qaralmoqda.

Oʻz navbatida “Lans” klubi futbolchini 30 million yevrolik taklif tushgan taqdirdagina sotishga tayyorligini ma'lum qilgan edi.

Muxlislar e'tirofiga koʻra, futbolchi Liga 1 ning birinchi davrasi ramziy jamoasiga kiritildi. Shuningdek Abduqodir Husanov Fransiya chempionatida oktyabr oyining “Eng yaxshi yosh futbolchisi” deb e'tirof etilgandi.

Transfermarkt portali futbolchining transfer bahosini 12 million yevroga baholadi.

Husanov yosh boʻlishiga qaramay, Oʻzbekiston terma jamoasining ham asosiy tarkibidan muqim joy egalladi. U hozirgacha 18 uchrashuvda milliy jamoa sharafini himoya qildi. “Zamin” yangiliklarini “Vkontakti”da kuzatib boring