O‘zbekistonliklarni haqoratlagan tiktoker qamoqqa olindi

^{Foto: IIBB}
Ijtimoiy tarmoqlarda Abdulloh nomi bilan tanilgan tiktoker Valeriy Yugay qamoqqa olindi. Bu haqda Toshkent viloyati IIBB boshlig‘i matbuot kotibi Bobur To‘laganov xabar berdi.

Ma’lum bo‘lishicha, u 2024 yilning oktyabr–noyabr oylarida Janubiy Koreyada bo‘lgan vaqtida ijtimoiy tarmoqdagi sahifalari orqali millatlararo nizo keltirib chiqarishi mumkin bo‘lgan, milliy qadr-qimmatni tahqirlovchi hamda diniy e’tiqodga ko‘ra fuqarolarni kamsituvchi so‘zlar bilan O‘zbekiston Respublikasi fuqarolariga nisbatan qator haqoratli chiqishlar qilgan.

Tiktoker joriy yilning 25 mart kuni Abu Dabi-Samarqand reysi orqali O‘zbekistonga keltirilib, huquq-tartibot organlari xodimlari tomonidan protsessual tartibda ushlangan.

Holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Unga nisbatan qamoqqa olish tarzidagi ehtiyot chorasi qo‘llanib, hozirda tergov harakatlari olib borilmoqda. “Zamin”ni Telegramʻda oʻqing!