Qashqadaryo viloyatida yo‘l harakati qoidalarini qo‘pol ravishda buzgan haydovchi ustidan qat’iy chora ko‘rildi. 11 sentyabr kuni Shahrisabz shahrida sodir bo‘lgan hodisa ijtimoiy tarmoqlarda katta muhokamalarga sabab bo‘ldi.
Videolavhalarda aks etgan holatda, piyodalar yo‘lakchasidan o‘tayotgan o‘quvchiga boshqa avtomobillar yo‘l bergani, ammo “Damas” haydovchisi harakatni to‘xtatmagani ko‘rinadi. Natijada bola xavfdan qochish uchun yugurib ketar ekan, muvozanatini yo‘qotib yiqilgan va avtomobil katta tezlikda uning yonidan o‘tib ketgan. Omadga ko‘ra, bola og‘ir jarohat olmagan.
Yo‘l harakati xavfsizligi boshqarmasi ma’lumotiga ko‘ra, qoidalarni buzgan 68 yoshli haydovchi tezda aniqlangan va unga nisbatan ma’muriy ish qo‘zg‘atilgan.
Shahrisabz shahri sudi qoidabuzarni BHMning 25 baravari (10,3 million so‘m) miqdorida jarima to‘lashga majbur qildi. Shuningdek, haydovchi bir yil muddatga transport boshqarish huquqidan mahrum etildi.
Mutaxassislar ta’kidlashicha, ushbu hodisa yo‘llarda piyodalar, ayniqsa bolalar xavfsizligini ta’minlash qay darajada muhim ekanini yana bir bor ko‘rsatdi. Jamoatchilik esa bunday qonunbuzarliklarga nisbatan yanada qat’iy choralar ko‘rish zarurligini ta’kidlamoqda.
“Zamin”ni Telegramʻda oʻqing!
