Kuz va qish — tabiat o‘zgarishlari, rang-barang manzaralar va inson kayfiyatidagi yangilanish fasli hisoblanadi. Bu yil ham dizaynerlar va moda mutaxassislari nafaqat kiyim-kechaklarda, balki hayot tarzida ham ilhom bag‘ishlaydigan ranglarga asosiy urg‘u berishmoqda.
Har bir mavsum o‘zining noyob trendlari bilan ahamiyatli. 2025-yil kuz-qish fasli ham shundan mustasno emas. Vogue jurnali tomonidan e’lon qilingan yangi mavsum ranglari nafaqat modada, balki interer dizaynda, aksessuarlarda ham muhim yo‘nalish sifatida namoyon bo‘ladi.
Birinchi navbatda qizil va ko‘kning uyg‘unligi — Scarlet Red hamda Cobalt Blue o‘ziga xos dinamika va hayajon bag‘ishlaydi. Qizil rang shijoat va ehtiros ramzi sifatida, ko‘k esa teranlik va ishonch timsoli sifatida yangi obrazlarga ruh baxsh etadi.
Shuningdek, tabiiy qahvarang (Natural Beige) tinchlik va oddiylikni ifodalasa, yorqin sarg‘ish (Golden Ochre) yangi imkoniyatlar va hayotga qiziqishni kuchaytiradi. Gladiator Black — qora rang esa doimiy klassika sifatida muvaffaqiyat va kuchli xarakter bilan bog‘lanadi.
Misty Blue — sukunat va osoyishtalik bag‘ishlaydigan och ko‘k tusi bo‘lib, har qanday uslubga uyg‘un holda kirishadi. Crimson Burgundy — zarg‘aldoq qizil esa muhabbat, ehtiros va ijodiy kuchning belgisi sifatida sezilarli bo‘ladi. Yana bir yangilik — Jasmine Orange, ya’ni och apelsinrang, insonlarga yangi fikrlar, ilhom va ruhiy kuch ulashadi.
2025-yil kuz-qish faslidagi ranglar odamlarga faqatgina yangilanish emas, balki ichki energiya, ishtiyoq va yaratuvchanlikni ham ulashishi kutilmoqda. Moda dunyosi bu mavsumda teranlik bilan birga quvvatli va jozibador ko‘rinishni ilgari surmoqda.
“Zamin”ni Telegramʻda oʻqing!
