Toshkent shahridagi atmosfera sifati 20-noyabr kuni ertalab yana jiddiy ahvolni ko‘rsatdi. Avtomatlashtirilgan monitoring stansiyalari soat 09:00 da qayd etgan ma’lumotlar poytaxt havosidagi mayda zarrachalar miqdori katta tezlikda oshganini ko‘rsatmoqda.
Mutaxassislar qayd etishicha, PM10 indikatori 299 mkg/m³ darajani ko‘rsatib, avval belgilangan me’yor — 300 mkg/m³dan oshmagan. Ammo vaziyatning eng xavotirli qismi PM2,5 ko‘rsatkichida kuzatildi — 202 mkg/m³. Bu ruxsat etilgan me’yordan (60 mkg/m³) qariyb 3,5 baravar yuqori.
Mazkur ko‘rsatkichlar havoda mayda zarrachalar saqlanib qolganini, ular atmosferaning pastki qatlamida to‘planganini anglatadi. Ekologlarning tushuntirishicha, keyingi kunlarda haroratning tez o‘zgarishi inversiya jarayonini kuchaytirib, zararli zarrachalarning tarqalmasdan bir joyda yig‘ilib qolishiga sabab bo‘lgan. Bu esa aholi sog‘lig‘i uchun xavfli hisoblanadi.
Mas’ul idoralar aholiga bir qator ehtiyot choralarini ko‘rishni tavsiya qilmoqda. Ayniqsa bolalar, keksalar va yurak-qon tomir hamda nafas yo‘llari kasalliklariga ega fuqarolar kuzatilgan holatga jiddiy e’tibor qaratishlari kerak.
Tavsiyalar quyidagicha:
— ochiq havoda yurishni, uzoq vaqt o‘zini faol harakatga solishni cheklash;
— tashqariga chiqishga to‘g‘ri kelganda tibbiy niqob taqib yurish, ayniqsa xavf guruhiga kiruvchi fuqarolarga;
— imkoni boricha yopiq binolarda bo‘lish, xona ventilyatsiyasini nazorat qilish va eshik-romlarni mahkam yopish.
Ekologik vaziyat yuzasidan qo‘shimcha ma’lumotlar va rasmiy tavsiyalar mutasaddi tashkilotlar tomonidan doimiy ravishda yangilanib boriladi. Maxsus xizmatlar aholini havo sifati ko‘rsatkichlarini kuzatib borishga va salomatlikni asrash uchun ehtiyotkorlikni oshirishga chaqirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
