Dunyodagi yirik dengiz boshqaruv kompaniyalaridan biri — V.Ships Global Recruitment O‘zbekiston fuqarolari uchun kruiz kemalarida ishlash bo‘yicha yangi vakansiyalar e’lon qildi. Bu imkoniyat xorijda ishlash, tajriba orttirish va turli mamlakatlarga sayohat qilishni istaganlar uchun qiziq taklif bo‘lishi mumkin.
Migratsiya agentligi ma’lumotiga ko‘ra, taklif etilayotgan ish o‘rinlarida oylik maosh 900 dollardan 1650 dollargacha belgilangan. Vakansiyalar orasida xizmat ko‘rsatish yordamchisi, bar ofitsianti, ikkinchi oshpaz, oshpaz yordamchisi va oshxona xodimi kabi lavozimlar bor. Umumiy hisobda 45 ta ish o‘rni taklif etilmoqda.
Ta’kidlanishicha, xodimlarning ish samaradorligiga qarab maoshi va lavozimi bosqichma-bosqich oshib borishi mumkin. Bu esa nomzodlar uchun nafaqat vaqtinchalik ish, balki xalqaro mehnat bozorida o‘sish imkoniyati hamdir.
Nomzodlar 18 yoshdan 45 yoshgacha bo‘lishi hamda ingliz tilini kamida B1 darajasida bilishi talab etiladi. Yevropa davlatlari tillarini biladiganlarga esa qo‘shimcha ustunlik berilishi mumkin. Chunki kruiz kemalarida turli davlatlardan kelgan yo‘lovchilarga xizmat ko‘rsatiladi va muloqot ko‘nikmasi muhim ahamiyatga ega.
Ishga qabul qilingan fuqarolarga turli mamlakatlarga sayohat qilish imkoniyati, AQSH ishchi vizasi hamda Migratsiya agentligi ishtirokida tuziladigan uch tomonlama shartnoma asosida huquqiy himoya kafolatlanadi. Bu esa ish jarayonida nomzodlar manfaatlari rasmiy tarzda himoya qilinishini anglatadi.
Ishga joylashish istagidagi nomzodlar kompaniya sayti orqali ariza qoldirishi kerak. Ma’qul kelganlar bilan kompaniya mutaxassislari bog‘lanadi, suhbatdan muvaffaqiyatli o‘tganlar keyingi intervyu bosqichiga taklif etiladi. Tanlangan nomzodlar bilan uch tomonlama shartnoma tuzilib, AQSH ishchi vizasi rasmiylashtiriladi.
Qisqasi, o‘zbekistonliklar uchun kruiz kemalarida ishlash bo‘yicha yangi imkoniyat ochilmoqda. Maosh dollarda, ish xalqaro muhitda, tajriba esa kelajak uchun jiddiy plyus. Faqat ingliz tilini tayyorlab qo‘yish kerak — okeanda “I don't understand” bilan uzoqqa suzib bo‘lmaydi.
“Zamin”ni Telegramʻda oʻqing!
