Elektron tijoratda kuryerlik faoliyati: Yangi tartib bilan nimalar o‘zgaradi?

O‘zbekistonda elektron tijorat sohasida kuryerlik xizmatlarini ko‘rsatish tartibini belgilab beradigan yangi hujjat loyihasi ishlab chiqildi. Bu hujjat bilan yetkazib berish xizmati va kuryerlik faoliyatini amalga oshirishning aniq va tushunarli mexanizmlari tasdiqlanishi kutilmoqda.

Hujjatda keltirilishicha, yangi tartib kuryerlik xizmatlarini ko‘rsatuvchi operatorlar va kuryerlar tomonidan tovarlarni xaridorlarga yetkazib berish jarayonini tartibga soladi. Bu jarayonda elektron savdo platformalari yoki buyurtma agregatorlari orqali rasmiylashtirilgan buyurtmalar ko‘zda tutilmoqda.

Buyurtmalar qanday amalga oshiriladi?

Tovar yetkazib berishga buyurtmalar xaridor yoki sotuvchi tomonidan elektron savdo tizimlari orqali rasmiylashtiriladi. Yetkazib berish muddati, narxi, to‘lov usuli va boshqa zarur ma’lumotlar xaridorga buyurtmani rasmiylashtirish paytidayoq xabar qilinadi.

O‘zini o‘zi band qilganlarga imkoniyatlar

O‘zini o‘zi band qilgan fuqarolar ham endi elektron tijoratda kuryerlik xizmati ko‘rsatishlari mumkin. Bu fuqarolar yetkazib berish xizmatini sotuvchilar, yetkazib berish xizmati operatorlari yoki bevosita xaridorlar bilan fuqarolik-huquqiy shartnoma asosida amalga oshirish huquqiga ega bo‘ladi.

O‘zini o‘zi band qilmagan jismoniy shaxslar esa, yetkazib berish xizmati operatorlari yoki sotuvchilar bilan mehnat yoki fuqarolik-huquqiy shartnoma asosida ishlash imkoniyatiga ega.

To‘lovlarni qabul qilish huquqi

Yetkazib berish xizmatini amalga oshiruvchi kuryerlar xaridorlardan to‘lovlarni (jumladan, naqd shaklda) qabul qilish huquqiga ega bo‘ladi. Bunda nazorat-kassa texnikasidan foydalanish va to‘lovlarning cheklarini berish kabi qonunchilik talablariga qat’iy amal qilinishi shart.

Xizmat shartlari qanday belgilanadi?

Kuryerlik xizmatini ko‘rsatish shartlari va talablari elektron tijorat ishtirokchilari o‘rtasida o‘zaro kelishuv asosida belgilanadi. Biroq bu shartlar yangi tartib va amaldagi qonunchilik me’yorlariga zid bo‘lmasligi lozim.

Yetkazib berishda xavfsizlik va ishonchlilik birinchi o‘rinda

Yetkazib berish xizmati operatorlari va kuryerlar tovarlarni yetkazish jarayonida tovarning butligi va sifatini saqlashlari, xaridor bilan kelishilgan vaqtga aniq rioya etishlari talab qilinadi. Bundan tashqari, xaridorga yetkazib berish jarayonini kuzatib borish imkoniyati ham yaratilishi lozim.

Xavfsizlik nuqtayi nazaridan yetkazib berish xizmati operatorlari va tadbirkorlik subyektlari qonunchilik talablari asosida tovarni yetkazib berish jarayonida xaridorlar va kuryerlarning sog‘lig‘i hamda hayoti xavfsizligini ta’minlash uchun tegishli choralarni ko‘rishi kerak.

Shunday qilib, yangi tartib elektron tijoratda kuryerlik xizmatini yanada qulay, xavfsiz va samarali amalga oshirish uchun keng imkoniyatlar eshigini ochadi. Bu esa bozorda sog‘lom raqobat muhitini shakllantirib, sohaning yanada rivojlanishiga turtki berishi kutilmoqda. “Zamin”ni Telegramʻda oʻqing!