Toshkent – Singapur reysi: yangi havo yo‘li muhokama qilindi

O‘zbekiston sayyohlik salohiyatini to‘liq ochib berish va xalqaro aviaqatnovlar geografiyasini kengaytirish yo‘lida navbatdagi muhim qadam tashlandi. “Uzbekistan Airports” kompaniyasi va dunyodagi eng nufuzli aviatsiya xablaridan biri hisoblangan Singapurning Changi aeroporti vakillari o‘rtasida amaliy uchrashuv bo‘lib o‘tdi. Muzokaralar davomida ikki mamlakat o‘rtasida to‘g‘ridan to‘g‘ri reyslarni tashkil etish masalasi atroflicha muhokama qilindi.

Singapur tomonidan katta qiziqish

Changi Airport vakillari Toshkent yo‘nalishiga kuchli qiziqish bildirib, bu yo‘nalishni yo‘lga qo‘yish uchun amaliy qadamlar tayyor ekanini bildirishdi. Ularga ko‘ra, Singapur sayyohlik kompaniyalari O‘zbekistonni yangi, o‘ziga xos va boy madaniyatga ega yo‘nalish sifatida ko‘rib, bu bozorga kirishga alohida qiziqish bildirmoqda. Ayniqsa, Samarqand, Buxoro va Xiva kabi tarixiy shaharlar xorijiy sayyohlar uchun jozibador manzil sifatida ko‘rilmoqda.

Toshkentning tranzit markaz sifatidagi roli

Uchrashuvda Toshkent xalqaro aeroportining Yevropa va Osiyo o‘rtasidagi muhim logistika nuqtasiga aylanayotgani alohida ta’kidlab o‘tildi. Changi Airport mutaxassislarining fikricha, Toshkentning Yevropa shaharlari bilan yo‘nalishlar soni ortishi uni mintaqadagi asosiy tranzit xablardan biriga aylantirishi mumkin. Bu nafaqat Singapur, balki butun Janubi-Sharqiy Osiyodan keluvchi yo‘lovchilar uchun qulay havo yo‘li shakllanishiga turtki bo‘ladi.

Hamkorlikdagi keyingi qadamlar

Muzokaralar yakunida tomonlar o‘zaro hamkorlikka tayyor ekanliklarini tasdiqlashdi. Har ikki tomon logistika, marketing va huquqiy jarayonlar bilan bog‘liq vazifalarni aniq belgilab, to‘g‘ridan to‘g‘ri aviaqatnovni amalga oshirishga doir keyingi amaliy qadamlarni muhokama qilib oldi.

Ta’kidlash joizki, Singapur kabi nufuzli xalqaro avia xab bilan hamkorlik yo‘lga qo‘yilishi O‘zbekiston uchun nafaqat transport infratuzilmasini rivojlantirishda, balki mamlakatning sayyohlik brendini global miqyosda mustahkamlashda ham muhim ahamiyatga ega bo‘ladi.

Foto: Dunyo “Zamin”ni Telegramʻda oʻqing!