O‘zbekistonda go‘sht mahsulotlarini ishlab chiqarish ko‘lami yildan yilga o‘sib bormoqda. Bu nafaqat aholi ehtiyojini qondirishda, balki ichki bozorda narxni barqarorlashtirishda ham muhim o‘rin tutadi.
Milliy statistika qo‘mitasi tarqatgan ma’lumotlarga ko‘ra, 2024 yil davomida yurtimizdagi barcha toifadagi xo‘jaliklar jami 2 million 137 ming tonna qoramol go‘shti yetishtirgan. Bu raqam mamlakatning oziq-ovqat xavfsizligini ta’minlashda fermer va dehqonlarning hissasi juda katta ekanini yana bir bor ko‘rsatmoqda.
Aniq raqamlarga murojaat qilsak:
– Fermer xo‘jaliklari hissasi 112,6 ming tonnani tashkil etgan;
– Dehqon va yordamchi xo‘jaliklar esa jami 1 million 962,1 ming tonna go‘sht yetishtirgan;
– Qishloq xo‘jaligi tashkilotlari tomonidan 63,0 ming tonna go‘sht ishlab chiqarilgan.
Shuni alohida qayd etish joizki, umumiy go‘sht hajmining qariyb 90 foizga yaqini dehqon va shaxsiy yordamchi xo‘jaliklar hissasiga to‘g‘ri kelmoqda. Bu esa aholining tomorqadan unumli foydalanishi, fermerlik madaniyatining keng tarqalgani va kichik xo‘jaliklar salohiyati yuqori ekanini ko‘rsatadi.
Hozirgi kunda mamlakatimizda ichki bozorni go‘sht bilan to‘liq ta’minlash, ehtiyoj yuqori bo‘lgan davrlarda importga muhtoj bo‘lmaslik uchun shunday statistik ko‘rsatkichlar katta ahamiyatga ega.
Shu bilan birga, poytaxt — Toshkentdagi bozorlarda go‘sht narxiga ham ijobiy ta’sir ko‘rsatmoqda. Ayni paytda shaharning beshta yirik bozorida qoramol go‘shti arzonlashib, iste’molchilar uchun hamyonbop narxlarda sotilmoqda. Bu holat aholi xarid qobiliyatiga ijobiy ta’sir ko‘rsatib, bozorda raqobat muhitini kuchaytirmoqda.
Mutaxassislar fikriga ko‘ra, kelgusida yetishtirilayotgan go‘sht hajmini oshirish, qayta ishlash sanoatini rivojlantirish va eksport imkoniyatlarini kengaytirish orqali mamlakat iqtisodiyotiga yanada katta hissa qo‘shish mumkin.
Go‘sht — bu faqat ozuqa emas, balki millionlab insonlar mehnatining natijasi, bozordagi barqarorlik va aholi hayoti sifatining ko‘rsatkichi hamdir. Shunday ekan, har bir fermer, har bir dehqon hosili ortida mamlakat taomili, milliy qadriyat va oziq-ovqat xavfsizligi turibdi.
“Zamin”ni Telegramʻda oʻqing!
