Kuz-qish mavsumiga tayyorgarlik doirasida O‘zbekiston bo‘ylab qariyb 9,8 mingta ko‘p qavatli uylar kapital ta'mirdan chiqarildi. Bu jarayonda binolar tomlari va fasadlari yangilandi, ichki muhandislik tizimlari modernizatsiya qilindi, podvallar va kirish joylari tartibga keltirildi.
Dastur doirasida 244 milliard so‘m mablag‘ ajratilgan. Qo‘shimcha ravishda xavfsizlik va qulaylikni oshirish maqsadida 1,5 mingta kodli qulf bilan jihozlangan metall eshiklar o‘rnatildi, 14,6 ming kvadrat metr shisha paketlar va 70 mingga yaqin energiya tejovchi yoritish uskunalari o‘rnatildi.
Shuningdek, lift xo‘jaligini modernizatsiya qilish ishlari olib borilmoqda: rejalashtirilgan 500 dan ortiq liftlardan 300 tasi allaqachon o‘rnatilgan, qolganlarini almashtirish ishlari davom etmoqda. Yashash xonadonlarida energiya samaradorligini oshirish maqsadida quyosh panellari va kollektorlar o‘rnatila boshlandi.
Xonadonlarda issiqlikni yaxshiroq saqlash uchun 195 ming kvadrat metr fasad bazalt materiali bilan qoplandi. Ushbu chora-tadbirlar 20 million kilovatt elektr energiyasi va 2,8 million kubometr tabiiy gazni tejash imkonini beradi, deb kutilmoqda.
Bundan avval Qurilish va uy-joy kommunal xizmat ko‘rsatish vazirligi matbuot xizmati ko‘p qavatli uylar aholisiga kirish joylarini tozalash boshqaruv kompaniyalari xodimlari majburiyatlari doirasiga kirmasligini tushuntirgan edi.
