Oʻzbekistonda diplomatik vakolatxonalar uchun bino va yerga egalik qilish tartibi qayta koʻrib chiqildi
Oʻzbekistonda xorijiy davlatlarning diplomatik vakolatxonalari, konsullik muassasalari va TIV huzurida akkreditatsiyadan oʻtgan ularga tenglashtirilgan tashkilotlarga xizmat koʻrsatish tizimini takomillashtirishga qaratilgan hukumat qarori qabul qilindi. Hujjat respublika hududida xorijiy missiyalarning koʻchmas mulkni egalik qilish, sotib olish va undan foydalanish mexanizmlarini yangilaydi, shuningdek dipservis faoliyatini isloh qiladi. Bu haqda podrobno.uz xabar beradi.
Qarorga muvofiq, “Diplomatik servis xizmati” davlat unitar korxonasi davlat muassasasiga aylantirildi.
Yangi tartibda diplomatik korpusga bino va yer uchastkalarini berish aniq qoidalar asosida yoʻlga qoʻyiladi. Asosiy yondashuv — paritet va davlatlararo kelishuv: endilikda mulkni diplomatik missiyalar ixtiyoriga oʻtkazish faqat oʻzaro teng shartlar asosida, tegishli davlat bilan xalqaro shartnoma tuzilgan taqdirdagina mumkin.
Agar xalqaro bitimlarda boshqacha qoida belgilab qoʻyilmagan boʻlsa, koʻchmas mulk diplomatik missiyalarga bozor qiymatida va faqat Oʻzbekiston Respublikasi Prezidenti qarori asosida realizatsiya qilinadi.
Shu bilan birga, diplomatik vakolatxonalar Oʻzbekistondagi jismoniy shaxslar hamda nodavlat yuridik shaxslardan ham koʻchmas mulk sotib olish huquqiga ega boʻldi. Bunday holatda missiya dipservisni xabardor qilib, obyektning foydalanish maqsadi, maydoni va joylashuvini koʻrsatishi shart.
Hujjat xorijiy vakolatxonalar foydalanayotgan barcha obyektlarni toʻliq tekshirishni nazarda tutadi. Ikki oy muddatda diplomatik missiyalar tasarrufidagi bino va yer uchastkalari yalpi inventarizatsiyadan oʻtkaziladi. Kadastr hujjatlari yoki ijara shartnomalari toʻliq rasmiylashtirilmagan obyektlarga alohida eʼtibor qaratiladi.
Tekshiruv yakunida ko'chmas mulkka doir huquqlar qonuniy holatga keltiriladi: bu paritet shartlari asosida oldi-sotdi shartnomalarini rasmiylashtirish yoki uzoq muddatli ijara shartnomalarini tuzishni anglatadi. Maqsad — diplomatik ko'chmas mulkdan foydalanishni tizimlashtirish va huquqiy maqomi noaniq obyektlarni bartaraf etish.
Yangi tizimda TIV huzuridagi Diplomatik servis xizmati xorijiy missiyalarni joylashtirish masalalarini muvofiqlashtiruvchi asosiy organ etib belgilandi. Dipservis akkreditatsiyadan oʻtgan diplomatik va xalqaro tashkilotlar ehtiyoji uchun bino qurish, rekonstruksiya va kapital taʼmirlashda yagona buyurtmachi sifatida ishlaydi.
Shuningdek, xizmat binolarni ijaraga berish, obyektlardan foydalanish shartlariga rioya etilishini nazorat qilish, diplomatik korpus uchun maishiy va ijtimoiy sharoitlarni tashkil etishda — dam olish, tibbiy xizmat hamda madaniy tadbirlar boʻyicha ham koʻmaklashadi.
Qaror ko'chmas mulk bitimlarida moliyaviy shaffoflikni kuchaytiradi. Diplomatik vakolatxonalarga obyekt sotayotgan jismoniy shaxslar va nodavlat yuridik shaxslar Soliq kodeksiga muvofiq soliqlarni toʻlashi lozim.
Bitim haqida xabarnoma kelib tushganidan soʻng Dipservis uch ish kuni ichida maʼlumotlarni soliq organlari va kadastr idoralariga yuboradi. Bu obyektlar va ularning egalari hisobga olinishi, shuningdek diplomatik ko'chmas mulk bo'yicha operatsiyalar nazoratini kuchaytirishga xizmat qiladi.
“Zamin”ni Telegramʻda oʻqing!
