Xabi Alonso “Real”ni qabul qilishga tayyor: u jamoaga olib keladigan futbolchilar nomini aytdi

Karlo Anchelottidan keyin Madridning “Real” klubini kim boshqarishi haqidagi savol so‘nggi paytlarda ko‘p muhokama qilinmoqda. Ayni vaqtda Germaniyaning “Bayer” klubida yaxshi natijalar ko‘rsatayotgan ispaniyalik murabbiy Xabi Alonso “Qirollik klubi” rahbariyatining asosiy tanlovi sifatida ko‘rilmoqda.

Madrid klubiga yaqin manbalarning ma’lum qilishicha, Alonso ham o‘z navbatida “Real”ni boshqarishga hozirdan tayyorgarlik ko‘rmoqda. U jamoa rahbariyati bilan bo‘lib o‘tgan muzokaralarda klub kelajagi uchun o‘zining aniq rejalari va talablarini qo‘ygan.

Xabi Alonso ayniqsa uch pozitsiya – markaziy himoya, chap qanot himoyasi va yarim himoya chizig‘ini kuchaytirish zarurligini ta’kidlagan. Uning fikricha, bu pozitsiyalar uning o‘zi amalga oshirmoqchi bo‘lgan taktik uslubiga ideal darajada mos kelishi kerak.

Jumladan, Alonso jamoa rahbarlaridan chap qanot himoyachisi sifatida hozir “Jirona”da to‘p surayotgan va avval ham “Real” akademiyasida tarbiyalangan Migel Guterresni ortga qaytarishni so‘ragan. Mutaxassis ushbu futbolchining salohiyatiga yuqori baho bermoqda va uning jamoaga qo‘shilishi klub uchun katta foyda keltiradi, deb hisoblaydi.

Shuningdek, Alonso yarim himoya chizig‘ini yanada kuchaytirish uchun “Real Sosedad”ning iste’dodli vakili Martin Subimendini olib kelishni talab qilgan. Bu futbolchi Ispaniya chempionatida oxirgi paytlarda eng yuqori baholarni olib kelayotgani bois, uning transferi Madrid klubiga ko‘p foyda keltirishi mumkinligi aytilmoqda.

Markaziy himoyani esa ingliz futbolida porlab kelayotgan iqtidorli Din Xyoysen bilan to‘ldirish rejalashtirilgan. Bu futbolchi Angliya futbolida o‘zining fizik kuchi va o‘yinni yaxshi o‘qiy olishi bilan allaqachon ko‘pchilikning e’tiboriga tushgan.

Xabi Alonsoning ushbu talablari “Real” rahbariyati tomonidan qizg‘in muhokama qilinmoqda. Agar kelishuv muvaffaqiyatli yakunlansa, ispaniyalik mutaxassis yaqin kelajakda o‘zining sevimli jamoasiga murabbiy sifatida qaytishi mumkin. Bu esa madridlik muxlislarning ham intizorlik bilan kutayotgan yangiliklaridan biri bo‘lib qolmoqda. “Zamin”ni Telegramʻda oʻqing!